Lıftke qaıtys bolǵan aqtóbelik jýrnalısiń kúıeýi qaıǵyly oqıǵany óz kózimen kórgen 3 jastaǵy qyzynyń qazirgi jaǵdaıy týraly aıtty, dep habarlaıdy Qamshy.kz aqparat agenttigi mgorod.kz saıtyna silteme jasap. 

Marqumnyń joldasy sol qaıǵyly oqıǵa qazir qyzynyń esine túsetinin aıtady. 3 jastaǵy qyz lıftke júgirip kirip úlgergen. Al onyń artynda kele jatqan anasy lıftke kirýge úlgermeı, esigi jabylyp, birden joǵary kóterilip ketipti. Marqumnyń denesin joldasy Qaıyrjan Erqasymovtyń ózi alǵan. 

«Áıelim lıftke kirip úlgermegen. Tek denesi ǵana kirgen de, aıaǵy syrtta qalyp qoıǵan. Keýdesi men ishin qysyp qalǵan. Ólimniń sebebi – qysylýdan bolǵan asfıksıa. Bul týraly sot saraptamasyn alǵanda bildim», – deıdi marqumnyń joldasy Qaıyrjan Erqasymov. 

Ótken senbide týystary Aızat Ábdisamatty jer qoınyna tapsyrdy. Marqumdy sońǵy saparǵa shyǵaryp salýǵa jaqyndary men tanystary ǵana emes, júzdegen tanys emes adam kelgen. Al marqumnyń joldasy Qaıyrjan anasynyń ólimin óz kózimen kórgen 3 jastaǵy qyzynyń jaǵaıyn oılap, ýaıymdap júr. Qaıyrjan Erqasymovtyń aıtýynsha, qyz 3 jasta bolsa da qorqynyshty jaǵdaıdyń bolǵanyn túsinedi. Búldirshinmen psıhologtar jumys istep úlgergen. 

«Birinshi kúni qıyn boldy. Uıyqtaı almadyq. Ekinshi kúni de esine túsip kete beredi. «Anamdy qysyp qaldy», — dep aıtady. «Anam qulady, sosyn men jyladym», - deıdi. Biraq anasyn suramaıdy. Menińshe, ol da sezedi. Ne degenmen qorqynyshty jaıtty óz kózimen kórdi ǵoı. Oqıǵa áli qyzymnyń kóz aldynda», – deıdi marqumnyń joldasy. 

Qaıǵyly oqıǵadan keıin oblys ákimi Berdibek Saparbaev barlyq jedelsatyny tekserýdi tapsyrdy. Al İshki ister departamenti bolǵan oqıǵanyń sebebi men kinálilerdi izdestirip jatyr. 

Esterińizge sala keteıik, birneshe kún buryn Aqtóbedegi turǵyn úılerdiń birinde áıel lıftke qysylyp, qaıtys bolǵan edi. Oqıǵanyń barlyǵyn 3 jastaǵy qyzy óz kózimen kórgen.