Qazaqstandyq kásipqoı boksshy Qanat Islamnyń demeýshisi, mesenat Baýyrjan Ospanov atlettiń kelesi jekpe-jegi ótetin ýaqytynyń belgili bolǵanyn aıtty. Bul týraly Vesti.kz habarlady.

«Qazir Qanat Islam Amerıkada jattyǵyp jatyr. Onyń kelesi jekpe-jegi 23 naýryz kúnine belgilendi. Biraq ázirge qarsylasynyń kim bolatyny belgisiz. Ol WBC boks uıymy reıtıńiniń joǵary ornynda tur. Endi bir jekpe-jekti sátti ótkizse, úzdikter bestigine kiredi. Sportshy men onyń komandasynda eshqandaı qarjylyq problema joq», — dedi Ospanov.

Aıta keteıik, jekpe-jek Domınıkan Respýblıkasynda, Kolýmbıada nemese AQSH-ta ótýi múmkin. Qanat Islam kásipqoı alańdaǵy jekpe-jekteriniń barlyǵyn Ekvador, Kolýmbıa jáne Domınıkan Respýblıkasy elderinde ótkizip keldi. Alaıda, onyń promoýteri kishi Nelson Lopes Qanattyń kelesi jekpe-jegi Qazaqstanda ótýi múmkin ekenin birneshe ret málimdedi.

Búginde jasy 30-ǵa kelgen Qanat Islam kásipqoı rıngte 18 ret urys ótkizip qoıdy. Ol WBA Fedelatin ataǵynyń jeńimpazy. Buǵan deıin Qanatpen argentınalyq Gýıdo Nıkolas Pıtto judyryqtasatyn bolyp sheshilip edi, biraq keıin urystyń bolmaıtyny habarlandy.

"Egemen"