Aqpannyń 22- sinde   «Qazaqstan daýysy» jobasynyń ekinshi maýsymynyń jeńimpazy Baýyrjan Retbaev pen jaqynda ataýyn ózgertken «Daýys.kz» tobynyń múshesi Berdibek Qulǵaraev týǵan jerge oraldy. Aqtaý áýejaıyna kelgen ánshi jigitti ata-anasy jáne bir top jankúıerleri kútip aldy. Olar jas ánshini jeńisimen quttyqtap, estelikke sýretke tústi. Baýyrjan óz kezeginde ózine daýys bergen barsha qazaqstandyqtarǵa alǵysynyń sheksiz ekenin taǵy bir ret aıtty.

Al bizge Mańǵystaýǵa oralǵan Baýyrjanmen suhbattasýdyń sáti tústi. 

- Jeńisiń qutty bolsyn! Jobadaǵy eń qıyn sátteriń qaı kezder boldy?

- Eń qıyn sátter bir efırden keıin ekinshi efırge  túsirilimge tańerteń  erte barǵan kezder der edim. Ol kezde ıntervú berip, daıyndyq jumystarymen qyzý aınalysasyń. Odan basqa aıtarlyqtaı  qıyndyqtar bola qoıǵan joq.

 — Jeńiske jetýiń tálimgerińniń nemese Ulyqpan Joldasovtyń arqasy ma?

- Men tálimgerim nemese Ulyqpan aǵanyń arqasy deı almaımyn. Maǵan birinshi bolyp kómektesken halyq. Munyń barlyǵy halqymnyń arqasy. Bul jerde barlyǵyn halyqtyń daýysy sheshti. Myqty degen daýys ıeleri ótpeı qalyp jatty. Ózderińiz kórdińizder.

- Fınalda oryndaǵan óleńderińniń ishinde qaısysy eń qıyny boldy?

-  Fınalda oryndaǵan ánderimniń ishinde eń qıyny «Sen muńymdy ber maǵan» áni boldy. Óıtkeni, bir aptada úsh ánniń sózin jattaý ońaı emes.

-Ulyqpan Joldasovtan basqa da shaqyrǵan prodúserler boldy ma?

-Ia, shaqyryp jatqandar kóp. Asa tanymal prodúserler dep aıta almas edim. Biraq Ulyqpan aǵany biz («Daýys.kz» aıtady) áke dep esepteımiz. Ulyqpan aǵany dalaǵa qaldyrmaımyz.

-5 mln teńgeni qaıda jumsamaq oıyń bar?

- Osyǵan deıin shyǵarmashylyǵyma jumsaımyn ba dep oılap edim. Biraq qazir oılanyp júrmin. Ústine qarajat qosyp úı alǵym da keledi. Almaty nemese Astana qalasynan.  Ony aldaǵy ýaqytta kórermiz.

- «Daýys.kz» jaqynda gastróldik saparǵa shyǵady degendi estidik. Qaı qalalardy aralamaq oılaryńyz bar?

- Ia, gastrólge shyǵý oıymyzda bar. Qaı qalalardy aralaıtynymyz ázirge belgisiz.  Ázirge stýdıada án jazyp jatyrmyz.

- Jańa án jazyp jatyrsyz ba? Olar qandaı mazmunda?

- Ia, jańa ánder jazyp jatyrmyz. On-jıyrma óleńdi álbomǵa daıyndaý ústindemiz. Qazirshe eki óleń bar. Bireýi «Aqqanat aıdaı perishtem» degen lırıkalyq án. Ekinshisi «Aqmańdaı» degen qazirgi jastardyń stılindegi «klýbnák» dep jatatyn ánderdiń qataryna jatady.

 — Basqa qandaı tilderde án aıtasyń?

- Ispan, ıtalán, orys tilderinde án aıtamyn. Biraq «Qazaqstan daýysynda» shet eldik ánderdi aıtýǵa kóp múmkindik bolmaıdy. Jobada bir ret qana shet tilinde án oryndaısyń.

- Suhbatyńa rahmet!

baistars.kz