Jatyryn "jalǵa bergen" almatylyq kelinshek qalaı baıyǵanyn baıandady
Sońǵy ýaqytta qoǵamda "bala týyp beremin" degen jańa qyzmet túri paıda bolǵan. Bireýdiń perzentin qursaǵynda toǵyz aı kóterip júretin analar elimizde de kóbeıip keledi.
Olardy kınodaǵydaı halyq "sýrrogat ana" dep ataıdy. Árıne, bul qyzmet túri aqyly. Jáne kópshiliktiń báriniń qaltasy kótere bermeıdi. Búginde "sýrrogat analar" eshkimnen jasyrynbaıdy, jasqanbaıdy da. Solardyń biri búginde meıramhanalardyń birinde uıymdastyrýshy bolyp isteıtin 38 - jastaǵy Gúlvıra Ospanqulova. Qursaq ana atanǵan kelinshek osydan alty jyl buryn ózge otbasyna bala týyp bergen.
"Maǵan páter kerek boldy sol úshin mundaı qadamǵa bardym. EKO týraly maǵan qurbym aıtty. Sosyn ol jerge qurbym ekeýmiz bardyq. Solaı sýrrogatty ana boldym. 20 myń dollarǵa kelistim", - deıdi qursaq ana Gúlvıra Ospanqulova.
Otyz jasynda kúıeýinen jesir qalǵan Gúlvıranyń týǵan-týystary da, jalǵyz qyzy da bul qyzmetine qarsy bolmapty. Al ózin Saltanat dep tanystyrǵan áıel eki ret qursaq ana atanǵan.
Mardymsyz jalaqyǵa kún kórgennen góri qomaqty qarjy tabýdy kózdegen kelinshek óz qyzmetin 35 myń dollarǵa baǵalapty. Tipti bir bólmeli páter men temir tulparǵa qol jetkizgenin aıtyp otyr.
"İstegen isimdi adal dep oılaımyn, óıtkeni aman esen toǵyz aıdan keıin týyp bergen balanyń anasy qolyna alǵannan keıin aqysyn da alady", - deıdi qursaq ana Saltanat.
Búginde EKO-ortalyqqa kúnine onshaqty erli-zaıypty kómek surap keledi eken. Bir perzentke zar bolǵandarǵa kómek qolyn sozatyn, ıaǵnı eki juptyń kelisimimen bala týyp beretin áıelder. Sondyqtan da sýrrogat ana búgingi qoǵamda asa qajet degen pikirde dárigerler.
"Elý paıyz hromosomalar sol áıelden bolady, bıologıalyq jáne atalyq uryqtyń elý paıyzy hromosomasy qosylady, sondyqtan, qursaq ananyń qatysy eshqandaı joq", - dep otyr reprodýktolog Anar Jolamanqyzy.
Búginde elimizde 350 myń otbasy bala súıý baqytynan aıyrylǵan. Iaǵnı túrli ekologıalyq, áleýmettik jaǵdaılarmen densaýlyqty kútpeýdiń saldarynan bedeýlik pen belsizdik sany jyl saıyn 15 paıyzǵa artyp otyr. Saldarynan olar qursaq ananyń kómegine júginedi. Tek byltyrǵy jyldyń ózinde 20 myńǵa jýyq sábı osyndaı qursaq analardyń arqasynda dúnıe esigin ashqan.
