Qoǵamǵa qatysty kishigirim komentarı bermek túgili, óz ómiri jaıly arnaıy suhbat berýi sırek ánshilerdiń biri - Mádına Sádýaqasova. Ótken jyly ol turmysqa shyǵyp, sosyn uldy bolǵanda el kádimgideı dúrligip edi. Ásirese, áleýmettik jelilerdiń jaryla jazdaǵany ras. «Qazaqstan daýsynda» qazylyq etkeni bolmasa, osy bir jyl ishinde esh jerde ol óziniń jeke ómiri jaıly lám dep aýzyn ashqan joq. Sodan da shyǵar, el arasynda «Mádına óı depti, búı depti» degen sózder tarap ketti. Sonyń qaısysy qaýeset, qaısysy ras? Kúni keshe ol Astana arnasyndaǵy «Syrlasýǵa» qonaq boldy. Sonda sol jerden kókeıde júrgen kúmándi jaıttardyń jaýabyn tizip alyp edik...
1.Mádınanyń «Forbes» jýrnalyndaǵy baı ánshiler tiziminde tórtinshi ekeni ras pa? – Qalaı desem eken?.. Roza Baǵlanova «Halyq óziniń jaqsy kóretin ánshisin ash qaldyrmaıdy, tońdyrmaıdy jáne jaıaý júrgizbeıdi» degen bolatyn. Rasynda, ekinshi ret turmysqa shyqqanǵa deıin mende bári boldy: Astananyń ortalyǵynan elıtaly úı, túrli qymbat áshekeıler, kıim-keshek, bári-bári... biraq, men oǵan ózimdi baı, baqytty sezingen joqpyn. Sebebi keshke úıge kelgende meni sup-sýyq bólmeler qarsy alatyn. Meni túsinetin, meni kútetin tiri jan joq... Keıde kóz jasyma erik berip: «qashan meniń óz otbasym bolady eken?..» deıtinmin. Qazir meniń janymda kúıeýim, balam, enem, eki qaınym bar. Meıli záýlim saraıda turmaıtyn shyǵarmyz, biraq baqytty bolýymyzǵa aıadaı bolsa da sol úsh bólmeniń ózi jetkilikti eken. Ár tańda ulymnyń úıdi basyna kótere jylap oıatqany, bárimizdiń soǵan azan-qazan bolǵanymyzdyń ózi sózben jetkize almas bir baqyt!
2. Oljaspen ony qosqan «oqys oqıǵa» degen ras pa? – Osyǵan deıin esh jerde aıtpaǵan edim, negizi oqıǵa bylaı boldy: «Eki-úsh jyldaı buryn Astanada júrgen kezimde kenet maǵan oqys habar jetti. Qońyraý shalyp turǵan Almatydaǵy páterimmen irgeles kórshim eken: «Mádına, sizdiń úıińizdiń esigi ashyq tur, soǵan qaraǵanda, ury túsken-aý» dedi. Daýsy dirildep tur. Qapelimde ne isterimdi bilmeı sasqalaqtadym da qaldym. «Qudaı-aý, kimge aıtamyn, ne isteımin?» dep turǵanymda, nege ekenin bilmeımin, oıyma birden Oljas tústi. Dereý uıaly telefonymdaǵy kontaktiler arasynan sonyń nómirin terdim. Ol artyq sózge kelmesten, birden aıtylǵan adreske «ushty». Artynsha «Mádına, ózińe bekem bol, úı ishiniń astań-kesteńi shyǵyp jatyr, ury túsipti» dedi. Kóndim. Ne isteı alamyn. Biraq men ol «tonaýdan» eshteńe joǵaltqan joqpyn, qaıta ózimniń naǵyz ómirlik serigimdi taptym. «Mássaǵan, bir aýyz sózim úshin bar tirligin tastap kirisip ketken adam, meni naǵyz túsinetin adam osy ýaqytqa deıin meniń janymda júrgen eken ǵoı» dedim...
3. ...Qabdesh Jumadilovtiń kelini me? – Ia, ras. Shynymdy aıtsam, qazaqta mundaı jazýshy baryn bilsem de, shyǵarmalaryn oqymaǵan ekenmin oǵan deıin. Bala kútip úıde otyrǵan bir jylda, «óz aıybymdy ótedim».
4.Ánshi taǵy júkti me? – Men jaıly mundaı aqparat qaıdan shyqqanyn bilmedim. Áıteýir elder qońyraý shalyp, habarlama jazyp, ár túrli jeliler arqyly quttyqtap jatty. Tipti ózim de «solaı bop qaldy ma, shynynda» degen oıǵa qaldym. (kúldi) Biraq, ol tek jaqsy sóz boldy... Kim bilsin?.. "Alash aınasy"
