Tý tikken aıbarly bekemdep tuǵyryn. Qazaqtyń kórsetken máńgilik ǵumyryn. Shańyraq kótergen irgeli ordanyń, Yrymdap qadaǵan qaıyspas ýyǵyn. Mańdaıyn sıpaǵan sahara samaly. Bahadúr erlerdiń ornatqan qamaly. Kereı men Jánibek kótergen baıraqtyń, Aıtýly álemge ataǵy tarady. Turannyń dalasy Túrkiniń besigi. Oǵylan Alashtyń jazylǵan nesibi. Arqanyń tórine at basyn tireýge, Áýelep keledi Altaıdan kósh úni. Kók tasy sóılegen kóshpendi babalar. Qoınaýy tarıh, syr tunǵan dalam ár. Ýaqyt kerýeni buıdasyn ustaǵan, Taıpalyp keledi qazaqtaı qara nar. Kók túrik únderi balbalda jańǵyryp. Kók aspan nurymen atatyn tań kúlip. Kók bóri rýhy jebegen halyqtyń, Kók týy bıikte jelbireý zańdylyq. Jandos Amanjoluly – 1990 jyly týǵan. S Amanjolov atyndaǵy Shyǵys Qazaqstan memlekettik ýnıversıtetiniń túlegi