"MýzART" tobynyń "Jeńeshem" ánine túsirilgen jańa beınebaıanynda top músheleriniń daýystary ádeıi aýystyrylǵan bolyp shyqty. Bul týraly toptyń múshesi Sáken Maıǵazıev habarlady. Aıta keteıik, buǵan deıin keıbir aqparat quraldary jańa beınebaıanda oryndaýshylardyń daýystary aýysyp ketkenin habarlaǵan edi.

Ánshiniń aıtýynsha, bul ázil bolsyn dep ádeıi jasalǵan, beınebaıannyń ózi de qaljyńǵa toly. "Ázilmen ádeıi jasaǵanymyz ras, áıtpese, Meırambektiń daýysyn tanymaıtyn qazaq joq. Kenjebektiń de daýysy erekshe. Biz bul ıdeıany burynnan aıtyp júrgen edik. Osyny, tipti, Ulyqpan Joldasovtan da surasańyzdar bolady. Biz sol kisimen aqyldasqan edik", - dedi oryndaýshy.

Maıǵazıevtiń aıtýynsha, beınebaıannyń mundaı túsinbestik týǵyzǵany durys bolǵan, sebebi Reseı shoý-bıznesinde mundaı ádisterdi ádeıi jasaıdy. "Shoý-bızneste aqshasyn berip te mundaı PR qadam jasaı almaısyń. Dál osylaı pikir týyp, talqylanyp jatsa, men oǵan qýanamyn", - dedi ánshi. Aıta keteıik, "Jeńeshem" ániniń sózin aqyn Qalqaman Sarın, al ánin Arman Beksultan jazǵan.

Eske sala keteıik, buǵan deıin "MýzART" tobynyń eki beınebaıany jaryqqa shyǵatyny habarlanǵan bolatyn. Beınebaıanǵa "Shanshar", "Aldaraspan", "Aqqý men gákký" sıaqty ázil-syqaq teatrlarynyń akterleri tústi.

Tengrinews.kz