2018 jylǵy 17 mamyrda Astana qalasynda Astana ekonomıkalyq forýmy alańynda bir taraptan Eýrazıalyq ekonomıkalyq odaq pen oǵan múshe memleketter jáne ekinshi taraptan Qytaı Halyq Respýblıkasy arasyndaǵy saýda-ekonomıkalyq yntymaqtastyq týraly kelisimge qol qoıyldy, dep habarlaıdy Qamshy.kz aqparat agenttigi. Ol eki el arasyndaǵy yntymaqtastyqty damytýdaǵy qýatty draıverge aınalýy tıis.  

Qazaqstan Respýblıkasynyń atynan Kelisimge Qazaqstan Respýblıkasynyń Premer-Mınıstriniń birinshi orynbasary Asqar Mamın qol qoıdy.

Kelisimdi bekitý týraly kelissózder eki jyl boıy júrgizildi.

Kelisim EAEO-ǵa múshe memleketter men Qytaıdyń arasyndaǵy ózara saýdany jaqsartý sharttaryn qurýǵa baǵyttalǵan, alaıda ol bajdy alyp tastaýdy nemese beıtarıftik bógetterdi avtomatty túrde tómendetýdi qarastyrmaıdy.

Bul shart ishki naryqty qorǵaý sharalary, saýdadaǵy tehnıkalyq bógetter, sanıtarlyq jáne fıtosanıtarlyq sharalar, kedendik yntymaqtastyq, zıatkerlik menshik, básekelestik, memlekettik satyp alýlar salasyndaǵy yntymaqtastyq, salalyq yntymaqtastyq, elektrondyq saýda tárizdi kóptegen saýdalyq retteý men yntymaqtastyq salasyn qamtıdy.

Kelisimge sáıkes taraptar DSU deńgeıinde ózara taýar saýdasyndaǵy saýda rejımin saqtaý kepildigi men quqyqtaryn bekitti.

Sondaı-aq, Kelisim arqyly ashyqtyq tetigi kózdelgen, ol quqyqtyq retteý júıesiniń aıqyndyǵyn, jalpy qoldanystaǵy sharalar jáne ákimshilik aktilerdi qabyldaý úderisterin, memlekettik organdardyń qyzmet úderisterin qamtamasyz etedi. Sonymen qatar, bul ashyqtyq tetigi taraptardyń sýbsıdıalar men saýda sharalary týraly habarlandyrýlardy, saýda salasyndaǵy ishki retteý týraly aqparattardy almasýyna múmkindik beredi.  

Elektrondyq saýda salasyndaǵy qol jetkizilgen ýaǵdalastyqtardyń da mańyzy zor bolyp tabylady. Kelisim tutynýshylardyń quqyqtary men múddelerin jáne olardyń jeke málimetterin  qorǵaý deńgeıin arttyrady jáne ınovasıa salasyndaǵy qaǵazsyz saýdany damytýdyń negizin qamtamasyz etedi.

Jalpy, kelisim QHR-men anaǵurlym tyǵyz saýda-ekonomıkalyq áriptestikke qaraı ilgerilemeli qozǵalystyń negizi bolýy tıis. Sonymen qatar, aqparat almasýdy damytýdyń, bógetterdi anyqtaý men Qytaımen ózara saýdany ilgeriletýdiń quralyna aınalyp, qosymsha yqtımal yntymaqtastyq salasyn izdestirýge yqpal etetin bolady.