Aqpannyń 5 kúni Ál-Farabı atyndaǵy QazUÝ-niń shyǵystaný fakúltetiniń uıymdastyrýymen "Shyǵys mádenıeti" atty festıvál ótedi, - dep habarlaıdy Qamshy.kz portaly.

"Festıváldi uıymdastyrýdaǵy basty maqsat – qoǵam múshelerin tańǵajaıyp   Shyǵys mádenıetimen tanystyrý jáne qoǵamnyń  ultaralyq hám mádenıetaralyq qarym-qatynas prosesine belsendi aralasýyna sep bolý"-deıdi sharany uıymdastyrýshylar.

Ál-Farabı atyndaǵy QazUÝ-de 2014 jyly 16 mamyrda tusaýy kesilgen Shyǵys Murajaıy – búginde shyǵys halyqtarynyń rýhanı jáne materıaldyq mádenıetinen jan-jaqty habardar etetin jádigerler jınaqtalǵan úlken ortalyqqa aınalǵan.

Qazirgi tańda Murajaıda antıkavarlyq buıymdar, shyǵys halyqtarynyń ulttyq mýzykalyq aspaptary, ulttyq kıimderi, qolóner buıymdary, áshekeıleri, shyǵys halyqtarynyń kúndelikti turmysynan habar beretin buıymdar jáne sırek kezdesetin kitaptar qoıylǵan.

Sondaı-aq, Shyǵys mádenıeti festıvali barysynda shyǵys halyqtarynyń baı rýhanı jáne materıaldyq mádenıetin kórsetetin ánder men bıler, ulttyq kıimder  jáne  ulttyq taǵamdar kórmesi uıymdastyrylady dep josparlanýda.

"Shyǵys mádenıeti festıvali aıasynda shyǵys halyqtarynyń shaı ishý dástúri, sonymen qatar, qytaı, koreı, japon, úndi, túrik, arab, ıran halyqtarynyń dástúrli taǵamdarynan dám tatyp, sol taǵamdardyń daıyndalýy haqynda qundy aqparat ala alasyzdar"-deıdi sharany uıymdastyrýshylar.