"Qazaq handyǵyna 550 jyl" shyǵarmashylyq báıgesine!

Ata jurtym - baq qaınarym Bilmeımin, Bul aranyń aspany – kim, Orynsyz odan bálkim jasqanýym. Óz elim, óz otanym qushaǵynda, Tabanǵa múmkin emes tastalýym.   Atajurt qasıetti shańyraǵym, Tańdaıdan tamyljyǵan  jalyn-ánim. At jyǵyp alystan kep jamyradym, Táńirim, endi aıyrma jalynamyn!   Ózińde taǵdyry ortaq janashyrym, Alaý etip kótergen Alash únin. Basqa túsken qaımyqpas taýqymetke, Qarǵa tamyr qazaqtyń balasymyn.   Ózińde tamyr tartqan bolashaǵym, Ózim han, ózim munda qarashamyn. Bıikpin betegeden jaıy kelse, Jaıshylyqta jýsannan alasamyn.   Jasaı ber tolyqsyǵan bostandyǵym, Altyn kúndeı álemge shashqan nuryn. Ózińde bar baqytym shash-etekten, Ózińde dáýrendeıdi astamdyǵym.   Qushaǵyńda alshańdap azattyǵym, Jasqanbaıdy eshkimnen qazaqtyǵym. Jahandaný jolynda jarlyq aıtyp, At mindi aýy tolar qazaq búgin.   Keýdemde silkinedi qýanyshym, Boıymda bulqynady bula kúshim. Azattyq, bostandyqtan artyǵy joq, Bosaǵan aıaqbaýdan qyran úshin...   Altyn besik Otanym atbaılarym, Sarqylmas shymyrlaǵan baq qaınarym. Shańyraq salar bolsań men bolaıyn, Qaıyspas qara naryń, aq taılaǵyń! O, súıikti atamekenim, Tabaldyryǵyńda turyp tájim etemin.   MAǴAN SALSA...   Kishi peıilge jasaıtyn kishiligim, Kishkentaıdan ustanǵan kisiligim. Jalbaryna júrýdi jaramsaqsyp, Mańdaıyna jazbaǵan túsinigim.   Kemshilikter degenge kishi-girim, Keshirimmen qaraıdy kisiligim. Basqa shapshyp dúr tóbet abynbasa, Elemeıdi qulaǵym kúshik únin.   Tákappardy kórgende jynym ustap, Búkteı salǵym keledi búrip ustap. Qumalaǵyn shashtyrar shatqaıaqpen, Qýyp salǵym keledi quryq ustap.   Qaskúnemniń qý soryn qaınattyryp, Eki qolyn artyna baılap turyp. Sot bıligi tıse eger jiberer em, «Tesken taýdan» ótkizip aıdattyryp.   Otyrǵanda jaırańdap oınap-kúlip, Shyryq buzsa bir sodyr boılap kirip. «Ashty sýǵa» esirte esirte bórttirip ap, «Or tekedeı» qoıar em «oınattyryp».   Qolymyzda turǵanda qaırattylyq, Aldymyzdy bógese aıbatty ulyq. Qolaqpandaı bılikten julyp alyp, Qoıa bergim keledi qoı baqtyryp.   Erge laıyq qaıda eken qaırattylyq, Tóńirekteı kórmesin maımaq qulyq. Ar-uıatsyz, namyssyz kórgensizdi, Búrke salǵym keledi shaınap turyp.     Jalqaýlarǵa júrgende ishim pysyp, Qorqaýlarǵa kórmegeı isim túsip. Aldamshyǵa albastym ustaǵanda, Jalǵanshyǵa turady tisim qyshyp.   Tarazysyn maqshardyń berse tórem, Ár minezdi mineýsiz ólsheter em. Túıe soıǵan kisideı túrip jeńdi, Qýyrdaqtyń kókesin kórseter em!   AZAMAT ÚNİ   Aq jańbyr bop oı sorǵala aspannan, Semip qalǵan qıal gúli tirilsin. Seniń kúshiń teńdessiz kúsh tasjarǵan, Meıli, meıli et júregim tilinsin.   Aq jańbyr bop oı sorǵala aspanan, Joıylsyn bir kóńildegi qara daq. Shabyt qusym túlep ushyp asqardan, Keter múmkin ıran baqty aralap.   Aq jańbyr bop oı sorǵala aspannan, Oısyz ótken kúnderime ashynam. Qushaq-qushaq gúl alamyn dostardan, Kókirekten samǵap ushsa asyl án.   Aq jańbyr bop oı sorǵala aspannan, Barlyǵymyz baqyttymyz bylaısha. Aqyn otyr janarynan jas tamǵan, Jalǵyzdyqty uqqan kim bar qudaısha.   Aq jańbyr bop oı sorǵala aspannan, Dúnıeniń tylsym syryn baǵaıyn. Oryndarmaı qalsa qalsyn basqa arman, Óleń-shamnyń biltesi bop janaıyn!   URPAQTARǴA ARYZ nemese ABAI ARÝAǴYNYŃ MONOLOGY   Ańsap kútken armandarǵa jetpedik, Kúńirene aıtarym bar ókpe ǵyp. Aıtyńdarshy, Urpaǵym-aý senderge, Til men dilden aıyrylsyn dep pe edik?!   Boılaryńnan baıqalmaıdy tektilik, Bar ma sende, Shamdaı janǵan tekti úmit. Jetesiz bop erjettińder qaıteıin, Máńgúrttikke kettińder-aý bet buryp.   Danalardyń sózin uǵar jan bar ma? Qashan shirkin samǵaısyńdar zańǵarǵa. Kóp sandyńnyń bolashaǵyń bulyńǵyr, Dármensizsiń qol sozǵanmen armanǵa.   Pendelikti tastaıtuǵyn múrdege, Bir urpaǵym tabylmaı ma, bul nege? Toǵyshar bop barasyńdar oılamsyz, Oranyp ap úlde menen búldege.   Maqtan bolyp ketem deseń bir elge, Ýaqytty qoldan tekke jiberme! Jeteli urpaq bolam deseń kózi ashyq, Jeti atańdy, salt-sanańdy túgende!   Erte sóngen jastyǵyńnyń alaýy, Meni osylaı aýyr oıǵa salady. Qýanar em jelbirese bıikten, Ómirińniń, órligińniń jalaýy.   Shyn súıe bil, mynaý darhan elińdi, Ata-anańdy, týǵan baıtaq jerińdi. Rızamyn osy aıtqan naqylym, Tebirentse seniń kóńil kógińdi.   Ómir-orman, Jol taba almaı bógelme, Arsyzdyqty tabanǵa sap kógende! Artta qalǵan muralardy qasterle, Arýaqty qurmetteseń egerde.   Daryn-shoǵyn qyzdyryńdar, kóseńder, Basqalarǵa jibermeńder eseńdi el! Jyrtyq úıdeı rýhyńdy bútinde, Jer-bessikte tynysh jatsyn deseńder!    Ábý ǴAPPARULY, 1983 jyly QHR-dyń Tarbaǵataı aımaǵy, Toly aýdanynda jazýshy otbasynda dúnıege kelgen. 2003 jyly atamekenge oralǵan. 2005-2009 jyldarda S. Amanjolov atyndaǵy Shyǵys Qazaqstan memlekettik ýnıversıtetiniń jýrnalısıka faýkltetin támamdaǵan. 2010 jyly «Óskemen» qalalyq gazetinde, 2011 jyly «Jas qazaq úni» gazetinde qyzmet atqarǵan. 2007 jyly «Sezimniń jyly jańbyry» atty alǵashqy jyr kitaby basylym kórdi. Óleńderi 2009 jyly Berdibek Saparbaevtyń demeýimen jaryq kórgen «Týǵan el – altyn besigim» atty almanaqqa, sonymen qatar 2013 jyly «Dástúr» baspasynan shyqqan «Jetisý jaýqazyndary» atty ujymdyq jınaqtarǵa engizilgen. 2014 jyly «Kermen» baspasynan «Talaptyń minip tulparyn» atty jas aqyndar jınaǵyna, 2014 jyly 10 tomdyq «Jyr marjany» atty qazaq poezıasynyń antologıasyna bir top jańa týyndylary kirgen. Oblystyq, respýblıkalyq jyr músháılalarynyń birneshe dúrkin jeńimpazy.