Ózi dana, sózi asyl, jyry dańǵyl, Qaımyqpaıtyn dushpannyń qyrynan bir. Qan qaqsatqan talaıdy Kremlde, Sájdesine bas ıdi uly Jambyl. Perishtedeı kúnádan azat pende, Sert etken jan Namazyn qaza etpeýge. Kremlde jańǵyrtty Alla esimin, Qudiretin kórsetip "kázzapterge". "Allalaǵan" ór úni sharq urady, Qabyrǵasy keń zaldyń qaltyrady. Namazyna uıyǵan pendesiniń, Mańdaıy da juldyzdaı jarqyrady. Aınalasyn bir ǵajap nur bóledi, Toqsandaǵy Jákeń bir túrlenedi. Ań-tań bolyp, bólenip bólek kúıge, Kúbirleser qalyń top "birdeńeni". Qart jyraýdyń ot shashyp janarynan, Jarqyldaıdy jasyndaı dana-qyran. Qubylaǵa kóz tikti "bátshaǵarlar", Esi ketip esken nur samalynan. Sezdi bálkim, sezbedi shýaq-nurdy, Boılaryna áıteýir qýat kirdi. Bolmasa da musylman júregimen, Allaǵa aıan, olar da qulap-turdy. Uly Quran bárin de ıildirdi, Jan saraıyn jańǵyrtty, kúıin kúlli. Túsindi olar Qudaıdyń qaıda ekenin, "Qudaı" sanap júrgenin buryn kimdi... Tóńkeristi deı alman túsinbedi, Moıyndady bir Haqty ishindegi. Uqty bálkim, Jalǵannyń jalǵandyǵyn, "Kósemniń" de ótirik "isingenin". Adamdary sezinip bir jylylyq, Nadandary ishinen turdy kúlip. Pendelerin keshir dep Jaratqannan, Abyz aqyn bir turdy, bir jyǵylyp. Ór daýysy sańqyldap Kremlde, Bir meıirim tógilip reńinde. Qulshylyǵyn jasady qaımyqpastan, "Qudaısynǵan" kúnáhar bul elinde. Qaharynan kósemniń qysylǵan joq, İzdemedi ózge oryn isim bar dep. Dál sol sátte "jez murt ta" Qudaıyna, Moıynsunǵan sekildi musylman bop. Álde, álde turdy únsiz otqa oranyp, Qaharynyń qylyshyn boqqa malyp. Uly Jambyl dál osy minezimen, Kápirlerdiń ordasyn taptady anyq. Ór minezin dáleldep Haqqa jaqyn, Teksizdiktiń saraıyn taptady aqyn. Aldanaǵan joq qurmetke, mártebege, Tabanynyń astynda jatsa da altyn. Alla esimi asqaqtap turdy bıik, Jambyl, Jákem bolǵan soń quldyq uryp. Betin sıpap, jymıyp "myna eneńniń", "Sheshesi bar ma eken" dep turdy kúlip... Serikjan QAJI, aqyn, Qazaqstan Jazýshylar odaǵynyń múshesi