Elimizde 200-den asa qyz-kelinshek sulýlyq salondarynan zardap shekken. Biriniń bet terisi búlinse, endi biri artyq daqtardan arylamyn dep júrip sary aýrýǵa shaldyǵypty.

Kútpegen jerden ajarynan aıyrylyp, usqynsyz kúıge túskender endi ózderin sorlatqan salondardy jaýapqa tartqyza almaı júr.

Kirpik-qasty qıyltyp, tipti erindi de shıedeı etip beremiz deıtin mekemelerde el estimegen sumdyqtar bar eken.

Qyz-kelinshekter eshkimnen de taıaq jemegen. Qantalap ketken kózdiń qabaǵy, kógergen bet terisi – munyń bári sulýlyq salondarynyń isi.

"Kelinshekter betime tyrtyq tústi dep keledi. Sulýlyq salondarynda toqpen jasartamyz dep olardyń júzderin kúıdirip jiberedi. Zardap shekkender tym kóp. Sondyqtan budan bylaı olarǵa zańmen qatań jaza qoldanýdy oılastyryp otyrmyz", - dedi depýtat Svetlana Romanovskaıa.

Osylaısha, "ájimdi tegistep, júzińizdi jasartyp beremiz" degen sulýlyq salondary 200-deı qyz-kelinshektiń bet-álpetin kúıdirip jiberipti. Tipti, teri astyńdaǵy artyq maıdy tesip alam dep betti birjolata búldirgender de bar.

Tek jurttyń kóz jasyna qalǵandardyń birde bireýi jazaǵa tartylmapty. Bul rette aldymen kelisim jasap alýǵa sol kánigi kosmetologtardyń ózi keńes berip otyr.

"Sulýlyq salondarynyń qyzmetin paıdalanbas buryn mindetti túrde kelisim-shart jasaý qajet. Sonda ǵana siz kosmetolog bolsyn, shashtaraz bolsyn,qaı-qaısysyn zań júzinde jaýapqa tarta alasyz. Ókinishke qaraı, kóp jaǵdaıda kelinshekter osy máseleni umyt qaldyryp jatady", - deıdi  kosmetolog Lılıa Myrzahmetova.

Dese de qazir kópshilik salonda kelisim-shart týraly ángime qozǵaýdyń ózi artyq. Resmı qujat túgili, medısınalyq anyqtamasy da joq kosmetologtardyń biri  qarańǵy jertólede otyr. Onymen qoımaı, aqysyn tóleseńiz qyzmettiń kez-kelgen túrin kórsetýge daıyn.

"Sizdiń betińiz bezeý-bezeý. Maı basyp tur. Onyń bárin kesip alyp tastamasa, ol etke jaıylyp jabysyp qalady. Sol úshin ony kesip alý kerek", - deıdi maman.

Kosmetolog bólmesinen góri, súlgi keptirgish jaıǵa kóbirek uqsaıtyn  qýyqtaı bólmede bizge bettegi maıdy kesýdi usyndy.

Al shynydaǵy suıyqtyqty ıne arqyly ekpek boldy. Ruqsat qaǵazyn suraǵanymyz sol edi, "sulýlyq syılaýshy" maman tabanyn jyltyratyp joq boldy.

Osyndaı kúmándi kosmetologtardyń kesirinen soqyr bolyp qalǵan pavlodarlyq kelinshek sol kúıi kinálilerdi jaýapqa tartqyza alǵan joq. Eń bolmasa emine dep aqsha da ustatpaǵan. Mundaı oqıǵalar sońǵy ýaqytta tipti kóbeıip barady.

Biraq ázirge ondaı sulýlyq salony qyzmetkerlerin jaýapqa tartatyn birde bir bap joq eken. Kórkine kórik qosyp, sulýlana túsýdi armandamaıtyn arý kemde kem. Biri kirpigine kirpik jalǵaıdy, al endi biri sý tıse de óshpeıtin boıaýlar saldyrtady.

Tek mundaı sulýlyqtyń sońy sor bolyp jabysýy ábden múmkin. Sondyqtan dárigerler kóbine terige qaýipsiz ári paıdaly bal, qıar sekildi tabıǵı ónimderdi paıdalanýdy usynady. KTK.KZ