Qaraǵandyda erejesiz jekpe-jekten ótken týrnırde Qazaqstannyń memlekettik týy taǵy da qorlandy.

28 aqpan kúni ótken jarysqa qatysýshylar týrnır bılbordyndaǵy logotıpten ekige bólinip, kreske uqsap turǵan Qazaqstan týyn kórgen.

"Bul týraly maǵan qatysýshylar aıtty. Olar týdy qorlaǵanyna ashýlanǵan. Baıqap qarasańyz, týdy ekige bólip, dýlyǵaǵa uqsas nárse jasaǵan. Sondaı-aq, krestiń beınesin de kórýge bolady", - deıdi zańger Jasulan Aıtmaǵambetov.

Týrnırdiń  kres joryqtary túrlerinen ótkizilgenin de zańger atap ótti. Osy oraıda, zańger memlekettik týdy qorlaǵandardy zańmen jazalaýdy surap otyr.  Óıtkeni, uıymdastyrýshylar muny sanaly túrde osylaı daıyndaýy múmkin.

Esterińizde bolsa, balkonǵa týdy ilip qoıǵany úshin Astana turǵynyna 400 myń teńge kóleminde aıyppul salynǵan edi.