Tanymal ánshi Aqbota Kerimbekova DAT basylymyna suhbat berip, qazirgi estrada týraly oıymen bólisti.

Ánshi "Búgingi shoý-bızneske múlde kóńilim tolmaıdy. Qarnyńdy ashytatyn dúnıeler óte kóp. Qolyma bılik tıse, ónerdi darynsyzdardan tazartamyn" dep aıtqanyn moıyndaǵan.

"Iá, kóńilim múldem tolmaıtyn darynsyzdarǵa nalıtynym – shyndyq. Qazir olardyń atyn atap, túsin tústemeı-aq qoıaıyn. Tipti bala-shaǵamyzǵa deıin biledi: kimniń ónerli ıa kimniń qarajaıaý ekenin. Sońǵy kezde qoldy bir siltep, sahnadan, ónerden ketip kalǵym keledi", - deıdi Kerimbekova.

Ol búgingi kúni aıtylatyn ánderdiń sapasy, maǵynasy, mazmuny tym jeńil ekenin aıtady.

"Álde halyqtyń talǵam deńgeıi tómen túsip ketti me dep oılaısyń. Degenmen, árkimniń óz pikiri, óz kózqarasy bar: onymen de sanasqyń keledi. Biraq, shyny kerek, ónerdiń qadiri ketti: qarap otyrsańyz, erikkenniń bári ánshi", - dedi ol suhbatynda.

Sondaı-aq, ol estradada júrgen ánshilerdi darynsyzdar dep, syn sadaǵyna alǵan.

"Estradada júrgen ánshilerdiń 80 paıyzy darynsyzdar dep tolyqtaı aıta alamyn. Bul – meniń jeke pikirim. Jalpy, óner – taza dúnıe, kirshiksizdikti qajet etedi. Bizde óner salasyn zertteıtin, BAQ arqyly oıyn aıtyp otyratyn synshy joq. Shyndyqty betke aıtatyn sarapshy joq: tek kimniń paıdasy bar, kimniń qolynan ne keledi – sonyń artynan júrip, paıdasyn kórip, sol adamǵa jaǵynyp qalsa – boldy. Ónerdiń boıyndaǵy tektilik joǵalyp, bólshektenip, usaqtalyp barady", - deıdi ánshi.

Aqbota Kerimbekova jastarǵa syn aıtqan soń, keıin basqalaryna jekkórinishti bolyp ketetinin de jasyrmady.

"Jastarǵa syn aıtsań, taǵy da bálege qalasyń. Aqyrynda jek kórinishti bolyp, jeksuryn atanasyń. Búginde aqyl turmaq, birýge jaqsylyq jasasań da, bálege qalasyń. Qorqatynym – balalarymnyń, óskeleń urpaqtyń taǵdyry qalaı bolmaq?", - dep aqtaryldy ánshi.

Bıylǵy jyldan bastap ánshilerdiń óz óneri úshin salyq tóleıtini týraly da Aqbota óz oıyn bildirgen.

"Endi ne isteımiz? Aıtqan eken – aqyry salyq tóleýge týra keledi. Úkimettiń jaǵdaıy qıyn eken... Aıtyp otyrmyn ǵoı, telearna bolsyn, jýrnalıser bolsyn – bári bizge qarap otyr. Ánshiler bolmasa, bári taqyr kedeı bolatyn túri bar... Endi, mine, úkimettiń jaǵdaıyn oılaıyq dep, salyq tóleýdi bastaımyz", - deıdi Kerimbekova.

Sonymen qatar, ol óziniń áli jas ekenin, óz janyn túsinetin er-azamat kezdesse, áli de 5-6 bala tabýǵa múmkindigi bar ekenin aıtqan.

"Ras, kóp balaly ana bolýdy armandaımyn. Kishkene jaǵdaıymdy rettep alsam, 2–3 balany asyrap alý da oıymda bar", - dedi ánshi sóz sońynda. abai.kz