"Qazaq handyǵyna 550 jyl" shyǵarmashylyq báıgesine!
Kók túrik aıqara ashty kók esigin, Dalaǵa mynaý jatqan egesi myń... Sarja tús, tobylǵy sap, alty qyrly, Kereıdiń kóbe buzar jebesimin! Atyldym arymdy órip adyrnadan, Amanat arqalanyp jatyr maǵan. Kereıden han Kenege kezeldim men, Jetkenshe synbaý paryz batyrǵa aman. On eki qanat úıdiń túndiginen, Umtyldym Ulytaýdyń kindiginen. Namystyń jebesimin jiger quıǵan, Jaraldym Uly halyq birliginen. Júıtkidim shańǵa qaldy jorǵa talyp, Kelemin qansha túmen qol qoparyp! Qasymǵa «qasqa jolyn» salyp kettim, Uly eldi jyqpas úshin jarǵa aparyp. Uıydy jaýdyń qany tańdaıyma, Óńgerdi qarsy kelse borbaıyna... Tektiden teksiz týmas Haqnazardyń, Baǵy men soryn jazdym mańdaıyna. Tas túıin qaharymmen túırep kelem, Jaý ótin tóstep kelem, súırep kelem. Túmen men túp qıanyn túrip tastap, Jaý tylyn Táýekelmen kúıretken em. Babasy kók bórili - Uly túrik, Jáńgir han tastar jaýdy túbi túrip. Alty júz qol «ah» urǵanda Orbulaqta, On myń bas kúlge aınaldy úgitilip. Aldymda dala jatyr shólden shókken, El jatyr kózdiń jasyn sherden tókken. Esimniń «eski joly» kókten túsip, Táýkeden «Jeti jarǵy» jerden jetken! Astynda zaýlap kelem jaryq aıdyń, Astymda qanǵa shomǵan alyp aıdyn. «Sary dala Uly halyq uıasy»-dep, Haq sózin ala ushtym Abylaıdyń! Qarashy, abyz dala ańyraýyn, Men kelem syńǵyrlatyp qońyraýyn. Qadaldym haq júrekke han Keneniń, Saýytty tesip ótip omyraýyn. Kesh qaldym... boz dalany qara japty, Qaıǵynyń qan piltesin ana jaqty... Báz bireý menen buryn jalmap ketken, Domalap ólmes basy bara jatty... Boz dala bozingendeı sherge tunyp, Qarasha el jete almady kórge turyp. Qadalyp men de qaldym bal-bal tasqa, Jel túrtse qaýyrsynym terbetilip... Júzdep jyl betin japtym kóp qabirdiń, Túbine uıalady kek tamyrdyń. Kenetten qaıta atyldym «Qus jolyna», Sýrylyp sadaǵynan Kók táńirdiń! Kók aspan aıqara ashty kók esigin, Aq saýyt azat eldiń kóbesimin! Sarmasaq, qamys sapty erkindiktiń, Úkili kúshigen jún jebesimin. Atyldym al, juldyzdar adyrnadan, Amanat taǵy artylyp jatyr maǵan... Jibekten jeıde kıip kútip alar, Máńgilik eldiń hany, aqyrǵy adam! 05.03.2015 Marǵulan AQAN
