Elimizde ótkeli jatqan basty saıası naýqanda jańa esim paıda boldy. Búgin Kásipodaqtar uıymynyń kóshbasshysy, Qaraǵandy oblysynyń eks-ákimi Ábilǵazy Qusaıynov QR Prezıdentin saılaýǵa qatysý úshin Ortalyq saılaý komısıasyna qujat tapsyrdy.
OSK ǵımaratyna kelgen Ábilǵazy Qalıaqparuly jýrnalıserge suhbat berip, bul qadamǵa nelikten barǵandyǵyn jáne qandaı nátıje kútetindigin aıtty. - Daýys berý ýaqyty bastalmaıynsha saılaýdyń nátıejeleri týraly aıtý artyqtaý. Prezıdenttik saılaý - qoǵamdaǵy ózekti máselelrdi kóterip, árbir azamattyń mańyzdy problemalaryna nazar aýdarýǵa shaqyratyn shara. Máselen, ol ekologıalyq jáne óndiristik qaýipsizdik syndy máseleler bolýy múmkin, - dedi Á.Qusaıynov.
Ábilǵazy Qalıaqparuly Qusaıynov - 1952 jyly 6 aqpanda Qaraǵandy oblysynyń Telman aýdany Maıózek kentinde týǵan. Qaraǵandy taý-ken tehnıkýmynyń taý-ken fakúltetin (1971) tehnık-shahta salýshy mamandyǵy boıynsha; Qaraǵandy polıtehnıkalyq ınstıtýtynyń avtojol fakúltetin (1981) ınjener-mehanık mamandyǵy boıynsha; Reseı basqarý akademıasynyń saıasattaný fakúltetin (1992) saıasatker (áleýmettik-saıası máseleler jáne baılanys boıynsha keńesshi) mamandyǵy boıynsha bitirgen. Eńbek ótiliniń ár jyldarynda ol QR Ekonomıka jáne saýda vıse-mınıstri, Indýstrıa jáne saýda vıse-mınıstri, Kólik jáne baılanys vıse-mınıstri, Kólik jáne baılanys mınıstri (2009-2011 jyldary), Qaraǵandy oblysynyń ákimi (2012-2013 jyldary) qyzmetin atqarǵan. Búgingi tańda Ábilǵazy Qalıaqparuly Qazaqstan Kásipodaqtar uıymynyń kóshbasshysy.
