13 naýryz, Qamshy.kz  -   Esterińizde bolsa, Prezıdent N. Nazarbaevtyń elimizde 26 sáýirde ótetin kezekten tys Prezıdent saılaýyna qatysatyny týraly aqparat jarıalanǵan bolatyn.  Osyǵan oraı Qamshy.kz  portaly 11 naýryz kúni  "Elbasynyń  saılaýaldy kompanıasyn kim basqarady" atty sholý jasaǵan edi. Onda Prezıdent Nursultan Ábishulynyń osyǵan deıingi saılaýdaǵy úgit-nasıhat jumystaryna jaýapty tulǵalardy saralaı kele, aldymyzdaǵy kezekten tys saılaýda Elbasynyń saılaýaldy kompanıasyn basqarýǵa laıyqty tulǵalardy nazarlaryńyzǵa usynǵan. Kompanıany basqarýy múmkin degen tulǵalardyń qatarynda burynǵy Prezıdent keńesshisi Muhtar Qul-Muhamed myrzada bolǵan edi. Keshe belgili bolǵandaı aldaǵy saılaý naýqanynda Prezıdenttiń kandıdatýrasyn nasıhattaý jumystaryn - eks-keńesshi Muhtar Abraruly atqarý týraly sheshim shyqqan. Bul týraly vlast.kz  portaly  Prezıdent ákimshiligine silteme jasaı otyryp habarlady. Muhtar Abrarulynyń bul jaýapty jumysqa taǵaıyndalǵany týraly qaýly búgin kúshine enýi múmkin. Muhtar Abraruly Qul-Muhamed myrza osyǵan deıin QR Mádenıet jáne aqparat mınıstri, Prezıdent keńesshisi, Memlekettik hatshy, Prezıdent ákimshiliginde, Prezıdenttiń baspasóz qyzmetin basqarǵan, Senator, Qyzylorda oblysy ákimi sekildi birqatar laýazymdy qyzmetterdi atqarǵan. Al  1999 jyly kandıdat Nazarbaevtyń saılaýaldy shtabyn Sergeı Tereshenko myrza basqaryp, saılaý aıaqtalǵan soń eki aıdan keıin qurylǵan "Otan" partıasynyń tóraǵasy qyzmetine taǵaıyndalǵan edi. 2005 jylǵy saılaýda bul qyzmet  burynǵy "Otan" partıasynyń tóraǵasy bolǵan Baqytjan Jumaǵulov myrzaǵa júktelgen bolatyn. 2011 jylǵy saılaý naýqanynda Prezıdenttikke úmitker Nazarbaevty jeńiske jetelegen "Nur Otan" partıasynyń birinshi orynbasary Nurlan Nyǵmatýlın edi.  Sátti aıaqtalǵan saılaýdan keıin Nurlan myrza da syı-syıapattan qur qalmaǵan. Al byılǵy saılaýda qazirgi Elbasy Nursultan Ábishulynyń saılaýaldy shtabyn basqarý laýazymy  Muhtar Abrarulynyń moınyna júktelip otyr. Eske sala keteıik, Muhtar Qul-Muhamed myrza naýryzdyń 4-i kúni Prezıdent Nazarbaevtyń sheshimimen Prezıdent keńesshisi qyzmetinen bosatylǵan bolatyn.