Ózi sulý, ózi aqyldy, boıyndaǵy ónerimen órge júzgen qazaqtyń qarapaıym qyzy Janar Duǵalovanyń tyńdarmandary myńdap sanalady. Byltyrǵy jyly «Turkvision-2014» halyqaralyq baıqaýynda jeńimpaz atanǵan ánshi qyz qazaq estrasynyń ǵana emes búkil túrki áleminiń nómiri birinshi ártisi ataǵyna ıe bolǵan edi. Janardyń talanty men ónerge degen súıispenshiligi, tabandylyǵy týraly keńinen áńgime qozǵaýǵa bolady. Alaıda Janardyń ánshiligen buryn, adamı qasıetteri, onyń ishki sezimderi men armandary týraly syrdy oqyrmanmen bólisýdi jón kórdi.
Janar «Turkvision-2014» baıqaýynan jeńispen oralǵannan keıingi bir aı ýaqytyn túrli BAQ-tarǵa suqbat berýge jumsady. Baıqaýǵa deıin de qazaq shoý-bıznesiniń jaryq juldyzy bolǵan Janardyń shyǵarmashylyǵy men ómiri búginde talalılardy qyzyqtyrady. Biz oqyrman nazaryna Janar jaıly jeti faktini usynyp otyrmyz.
1. Janardyń ónerdegi áriptesteri, óziniń qurby dostary onyń boıyndaǵy eń keremet qasıet – qarapaıymdylyq ekenin aıtady. Óıtkeni Janar ózin eshqashan «án áleminiń hanshaıymy» sezingen emes. «Men «juldyz aýrýy» degendi túsinbeımin. Óıtkeni men juldyz emespin, ártistik meniń mamandyǵym. Eger ánshi ózine-ózi rıza bolyp, keýdesin kere bastasa, ol Maıkl Djekson sekildi aty ańyzǵa aınalǵan ánshilerdi tyńdap, sabasyna túsý kerek dep oılaımyn», deıdi ánshi. Janardyń óz shyǵarmashylyǵyna qatal synmen qaraıtynyn prodúseri de, ónerdegi dostary da jıi aıtady. Estýimizshe ol óziniń «Turkvision-2014» baıqaýynda oryndaǵan ániniń beınejazbasyn áli kórmegen. «Jurttyń bári maqtaýyn asyryp jatqan beınejazbany kórsem, ózimniń oryndaýyma kóńilim tolmaýy múmkin. Sondyqtan biraz ýaqyt ótsin, keıinirek kórermin», deıdi ánshi.
2. Janar Duǵalovanyń dostary óte kóp. Ádette tanymal, sulý qyzdardyń dostary az bolady dep jatady. Biraq Janardyń Almaty, Pavlodar, Máskeý qalalarynda dostary óte kóp eken. «Ánshi qyzdar bir-birimen dos bola almaıdy, tek básekeles bolady degenge men kelispeımin. Meniń óner áleminde birge júrgen, jaqsy aralasatyn dostarym óte kóp. Sondaı-aq shoý bıneske, mýzykaǵa múlde qatysy joq qurbylarym da jeterlik. Árıne, óner adamdarynyń arasynda qyzǵanyshtyń bolatyny ótirik emes. Alaıda men ózime unamaıtyn, olardyń janynda ózimdi jaısyz sezinetin adamdarǵa jaqyndamaýǵa tyrysamyn. Menińshe dos bolatyn adamdardyń jandary jaqyn bolady dep oılaımyn. Iaǵnı kózqarastary uqsaıdy, talǵamy bir-birine saı keledi».
3. Janar óleń jazady, án shyǵarady. Mýzyny qulaı súıetin Janardyń ádebıetke degen qyzyǵýshylyǵy erekshe. Janar búginde erekshe qabiletke ıe qyz týraly roman jazyp jatyr eken. «Romannyń jazylyp jatqanyna 3 jyldan asty. Alla buıyrsa jaqynda aıaqtaımyn» deıdi ánshi. Janar shaǵyn áńgimeler men romandar jazýdy óziniń hobbıi sanaıdy. Ánshi óziniń ádebıet arqyly shabyttanatynyn, tynyǵatynyn aıtady.
4 Janar dúken aralaǵandy, zamanaýı tilmen aıtqanda «shopıngti» unatpaıtyn adamdar qatarynda. Ádette názikjandylar jany jabyrqap, áldenege renjise ózderin dúken aralaý arqyly tynyshtandyryp, «shopıngterapıamen» emdep jatady. Alaıda dúken aralaý Janardyń eń jek kóretin isi bolyp shyqty. Ánshi óziniń «Turkvision-2014» baıqaýynda júldeger atanǵany úshin alǵan 20 000 dollar aqshalaı júldesin shyǵarmashylyǵyna jumsaǵanyn, klıp túsirgenin aıtty.
5. Janar kólikti óte uqypty júrgizedi. Qurbylarynyń aıtýynsha Janar jyldamdyqty eshqashan asyrmaıdy, jol erejesine óte jaýapkershilikpen qaraıdy eken. Alaıda ánshiniń bir kemshiligi, joldardy eske saqtaı almaýy. Qaı qalada tursa da, qalanyń kósheleri men joldaryn jıi shatastyratyn kórinedi.
6. Janardyń ishki túısigi, kókirek kózi, sezimtaldyq qasıetteri erekshe. Keıde ánshi ózi eshqashan kórmegen, tanymaıtyn adamdarymen alǵash kezdeskende-aq olar týraly bilip turatyn qasıeti bar eken. Aıtalyq jańa tanysqan adamnyń qansha balasy bar, keıde kezdesken adamdarynyń aty-jóni kim ekenin de aıtqyzbaı biletin kórinedi. Iaǵnı, ánshiniń aıtýynsha bul eshqandaı da kóripkeldik emes, tek ıntýısıa deıdi ol.
7. Janar jaıynda aıtylǵanda jurtty eń qyzyqtyratyny – Janardyń jeke ómiri. Óner aıdynynyń aqqýy kimniń baq qusyna, jan jaryna aınalatyny qyzyqtyrady kópshilikti. Alaıda Janar óziniń jeke ómirin qupıa ustaıtyn ánshilerdiń sanatynan. Jasy 28-degi ánshi endigi jeter úlken jetistigi jar qushyp, bala súıý bolsa kerek. Aıtpaqshy, Janar óte balajan eken. Keminde 2 balanyń anasy bolýdy armandaıtyn ánshiniń súıiktisi bar ma? Uzynqulaqtan Janar týraly estigen jurt Janar men Álı Oqapovtyń arasynda mahabbat sezimi bar eken desedi. Alaıda bul sybystyń qanshalyqty shyndyqqa janasatynyn biz bile almadyq. Al Janar bolsa óziniń suqbattarynyń birinde: «Men bolashaq jarymnyń mýzykany jaqsy kóretin adam bolǵanyn qalasam da, ánshi bolǵanyn qalamas edim. Biraq kim biledi, bolashaq kúıeýim ánshi bolýy da múmkin ǵoı. Degenmen óz basym joldasym rejıser, jazýshy sekildi shyǵarmashylyq adamy bolsa eken dep armandaımyn» degen edi ánshi.
©Aınur Nursabet
