Bıyl Shyǵys Túrkistandaǵy Alash ıdeıasyn nasıhattaýshy ult qaıratkeri, tarıhı tulǵa, aqyn, aǵartýshy Tańjaryq Joldyulynyń (1903-1947) týǵanyna 112 jyl toldy. Tańjaryq – qazaq jazba poezıasynyń kórkemdik deńgeıin kóterip qana qoımaı, aıtys óneriniń de tarıhı betterin ashqan adýyndy aıtysker. Abaıdan bastap zamandasy bolǵan Alash arystarynyń shyǵarmashylyǵyn jete tanyp meńgergen. Alash ıdeıasyn Qytaıdaǵy qazaqtarǵa túrli joldarmen nasıhattaǵan. Quljada alǵash ret qazaq teatryn ashyp Beıimbettiń «Shuǵa» pesasyn sahnalap, basty róldi somdaǵan. 1935-jyly qytaı qazaqtarynyń tuńǵysh baspasózi – «İle ózenin» shyǵarýy uıymdastyrǵan ári bas redatory bolǵan. Kóptegen mektepterdiń ashylýyna yqpal etken. Aqynnyń kóp óleńi abaqtyda jazylǵan. Túrme ádebıetin qalyptastyryp, sol kezdegi qoǵamdyq shyndyqty óleń, tolǵaý, ánderi arqyly búkpesiz pash etken. Aqynnyń kóptegen óleń, arnaý, tolǵaýlary, qısa-dastandary men áıgili aıtystary bar. Aqyn shyǵarmalarynda XX ǵasyrdyń alǵashqy jartysyndaǵy qytaıdaǵy qazaqtardyń tarıhı taǵdyry, almaǵaıyp saıası ahýal, kúrdeli áleýmettik máseleler aına qetesiz ashyp kórsetiledi. Aqynnyń 112 jyldyǵyna, Qazaq handyǵynyń 550 jyldyq mereı toıyna oraı 17-18-naýryzda Almatyda qalalyq «Tańjaryq oqýlary» ótedi. Oǵan qaladaǵy 8 oqý ornynan 40tan astam stýdent, magıstrant qatyspaq. Igi sharany Qazaq memlekettik Qyzdar ýnıversıteti uıymdastyryp otyr. Basty maqsaty: Alash urandy ádebıettiń beldi ókili, ult qaıratkeri, aqyn-aǵartýshy Tańjaryq Joldyulynyń óleńderin, ónegeli ómirin dáripteý, jas urpaqty qazaq ádebıeti men tarıhynyń aqtańdaqtaryn ashýǵa, zerdeleýge shabyttandyrý. Qatysýshylar Tańjaryq óleńderin jatqa oqyp, aqyn ómiri men shyǵarmashylyǵy týraly suraqtarǵa jaýap berip, teatrlandyrylǵan qoıylymdar jasaıdy. Oǵan Tańjaryqtanýshy ǵalymdar, zertteýshiler, belgili aıtysker aqyndar, tanymal ánshiler qatyspaq. İs-shara aıasynda Tańjaryq Joldyulynyń aıtystarynan úzindi oryndalyp, ánderi shyrqalady.
Sharanyń ótetin ýaqty: 18.03.2015j. Saǵat: 14:00 Meken-jaıy: Almaty qalasy, Gogol kóshesi, 114. 1- ǵımarat, 218 kabınet, Qazaq ádebıeti kafedrasy. Baılanys telefondary: Tursynbaı Dáýituly: 233-19-31, 8-701-148-20-10
