Qazaqstandyq isker áıelder óz kásibin sátti dóńgeletkennen bólek tanymaldyqqa ıe bolýda. Olarǵa uqsaǵysy keletinder men úlgi tutatyndar sany kún sanap kóbeıýde.
Áleýmettik jelidegi jazbalary úlken talqyǵa túsip, tanymal áıelderdiń paraqshalary sóztalas alańyna da aınalyp jatady. Osyǵan oraı nespi.kz saıty jelide óte tanymal qazaqstandyq áıelderdiń tizimin jarıalady.
Tanymal telejúrgizýshi Láılá Sultanqyzynyń ınstagram paraqshasynda 80 myńnan astam dosy bar. "Balapan" telearnasynyń dırektory óz jazbalaryn tek qazaq tilinde júrgizedi. Ol áleýmettik jelidegi dostarymen túrli túsirilim barysyndaǵy tanymal azamattarmen túsken sýretterimen bólisip otyrady.
"Mıloserdıe" qaıyrymdylyq qorynyń dırektory Arýjan Saın da áleýmettik jelide tanymal áıelderdiń biri. Ol jelidegi paraqshalaryna negizinen aýyr dertke shaldyqqan balalarǵa jasalǵan kómek jaıly maǵlumattar taratady. Arýjannyń ózi "Áleýmettik jeli áleýmettik kómek kórsetý úshin qyzymet kórsetýi kerek" deıdi.
Ánshi, prodúser, tanymal telejúrgizýshi Ásel Sádýaqasovanyń ınstagram dostarynyń sany búginde 236 000-ǵa jetken. Ásel jelidegi dostaryna túrli túsirilimderden, juldyzdar arasyndaǵy toı-jıyndardaǵy sátterden sýret joldap otyrady.
Ánshi, telejúrgizýshi Asha Mataıdyń ómirine, isine qyzyǵatyndar sany az emes. Ol jelidegi dostaryna áshekeı zattardyń túr-túrin jarnamalaıdy desek artyq aıtqandyq emes. Budan bólek Asha Mataı dostaryn jalyqtyrmaı, juldyzdar arasyndaǵy jabyq keshterden, alýan túrli kıimdegi sýretterimen bólisip otyrady.
Ánshi Maqpal Isabekova ınstagram paraqshasynda talaı ret qatań synǵa ilikti. Birde tipti "Maqpal jelidegi dostaryna qapa bolyp endi ınstaramdy qoldanbaıtyn boldy" degen áńgime tarady. Biraq kóp ýaqyt ótpeı-aq bul sózdiń jalǵan ekeni anyq boldy. Dese de, ánshi óziniń syrtqy kelbetine apta saıyn tájirıbe jasaýdy jalǵastyrýda.
Belgili aktrısa Ásel Saǵatova da ınstagram jelisine jıi sýretterin salady. Alaıda jeke ómirin qupıa ustaıtyn Ásel tek jumys barysyndaǵy, túsirilim kezindegi áriptesterimen túsken sýretterin salady. Bul aktrısa da "Ironıa lúbvı" fılmine túskennen keıin qatań synǵa alynǵan edi.
Sabına Altynbekova sońǵy bir jyldan astam ýaqytta úlken tanymaldylyqqa ıe boldy. Qarapaıym voleıbolshy qyz óziniń syrtqy sulýlyǵynyń arqasynda tek Qazaqstanda ǵana emes, Qytaı, Japonıa syndy alyp elderde de keńinen tanyldy. Onyń ınstagram paraqshasynda 400 myńǵa jýyq dosy bar.
Qazaqtyń erke qyzy Maqpal Júnisova da sońǵy jarty jylda ınstagram jelisin belsendi paıdalanyp júr. Onyń áleýmettik jelide júz myńǵa jýyq dosy bar. Ánshi óz ánderinen, beınebaıandarynan úzindiler salyp otyrady. Sondaı-aq otbasylyq qýanyshtarymen bólisip otyrýdy da ádetke aınaldyrǵan.
Qazaqstannyń Halyq ártisi Roza Qýanyshqyzynyń áleýmettik jelidegi paraqshasynda 60 myńnan astam dosy bar. Ánshi kúndelikti ómirinen, is-saparlarynan, beınebaıandarynan úzindiler salyp otyrýdy ádetke aınaldyrǵan. Roza Qýanyshqyzynyń jazbalaryna qarap, kóp ýaqytyn jumysyna arnaǵanyn baıqaýǵa bolady.
Belgili prodúser, telejúrgizýshi Baıan Esentaevanyń ınstagramda 550 myńǵa jýyq dosy bar. Ol jelidegi paraqshasynda óz jobalarynyń jetistikteri, jańalyqtarymen bólisip otyrady. Sońǵy kezderi osy ýaqytqa deıin kókeıine túıgen ómirlik tájirıbesimen bólisýdi ádetke aınaldyrǵan. Árıne, Esentaevanyń jetistikterin úlgi etetinder sany ózgelermen salystyrýǵa kelmeıdi.
Áleýmettik jeli arqyly telejúrgizýshi Aıgúl Múkeıdiń júzin ańdyǵandar da az emes. Ol óziniń ınstagram paraqshasyna uly Asanálimen túrli elderge jasaǵan saıahatynan, jumys barysyndaǵy sátterden sýret, vıdeo úzindilerimen bólisip otyrady.
Turkvision-2014 baıqaýynyń jeńimpazy Janar Doǵalovanyń ınstagram paraqshasyndaǵy dostarynyń sany 260 myńǵa jetken. Ol jumys barysyndaǵy qyzyqty sátterine sýretter salyp otyrady. Janar Doǵalova paraqshasyn qazaq tilinde júrgizip otyrady.
Ánshi, telejúrgizýshi talaıdy syrtqy sulýlyǵymen qyzyqtyratyn Dılnaz Ahmadıevanyń ınstagram paraqshasynda 235 myń jazylýshy bar. Ol tabynýshylaryna shyǵarmashylyq sátten qyzyqty sýretter salyp otyratyn.
Sońǵy kezderi birneshe ret ómirlik jaryn da kórsetken edi. Budan bólek shyǵarmashylyqtyń adamy qýanyshty, kóńili túsken sátterdi de dostaryna jazyp otyrady.
25 jasynda talaı belgili fılmderde basty roldi somdaǵan Aısulý Ázimbaevanyń da áleýmettik jelide dostary kóp. Jas ta bolsa Aısulý óziniń sulýlyǵy men súıkimdiligimen kópshilikti baýrap aldy. Ol áleýmettik jelidegi dostaryna jeke ómirimen, túsirilim barysyndaǵy sáttermen bólisip otyrady.
Buryńǵy májilis depýtaty Baqyt Syzdyqova da áleýmettik jelilerdiń birnesheýin birden qoldanady. Ol óziniń kóńildiligi men ashyqtyǵymen kópshilikke unaıdy. Jelidegi paraqshalarynda saıası jaǵdaılarǵa baılanysty jıi pikir qaldyrady.
Telejúrgizýshi Dınara Sátjannyń da áleýmettik jelide dostary kóp. Ol jelige túrli demalystarynan, otbasyndaǵy qýanyshtarynan, túsirilim barysynan sýretter men qysqa vıdeo salyp otyrady.
"Keshyou" tobynyń burynǵy ánshisi Aıdana Mádenova da ınstagram jelisine kúnine joq degende eki sýret salady. Kóbinde ánshi dostary, áriptesterimen júrgen sátpen bólisedi. Sońǵy kezderi ánshi turmysqa shyǵatynyn, bolashaq jarynyń syılyqtaryn jıi jarıalap júr.
Gúlnar Sılybaeva da vk,twitter jelilerin jıi paıdalanatyndardyń biri. Instagram paraqshasynda talantty aktrısa túrli jobalardaǵy qyzyqty sáttermen bólisip otyrady. Aktrısa óziniń kóńildi ári qyzyqty jazbalarymen oqyrmandarynyń kóńilinen shyǵyp jatady.
