18 naýryz. Qamshy.kz - Eki aıdan soń "Jeńis kúni" merekesi.  Osyǵan oraı biz portalymyzda "Sizdiń Uly Otanyńyz qaısy?" atty saýalnama júrgizgen bolatynbyz. Saýalnama bir aı boıy jalǵasyp, oǵan 1000-ǵa jýyq adam qatysty. Daýys berýshilerdiń 96 paıyzy, ıaǵnı, 1000 adam Uly Otanym "Qazaqstan Respýblıkasy(Qazaq eli)" dep jaýap berse, saýalnamanyń "Toıǵan jerim" degen nusqasy 20 adamnyń daýysymen 2 paıyzdy quraǵan. Al saýalnamaǵa qatysýshylardyń 1 paıyzy (13 adam) "Qazaq sovet sosıalısik respýblıkasy" degen nusqany tańdasa, 8 adam "Eýrazıalyq ekonomıkalyq odaqty" tańdaǵan.

Caýalnamaǵa bir kompúter arqyly(IP meken-jaıy) tek bir ǵana adam daýys bere alady. Osyǵan deıin qazaqstandyq buqaralyq aqparat quraldarynda "Uly Otan" ataýyna qatysty ult zıalylary, qalamgerler men qoǵam qaıratkerleri arasynda túrli talas-tartys órbigen bolatyn. Jeńis kúni qarsańynda "Qamshy" portaly júrgizgen saýalnama qorytyndysy kórsetkendeı qazaqstandyqtardyń 96 paıyzy ózderiniń Uly Otandaryn Táýelsiz Qazaqastan Respýblıkasy dep tanyǵan. Saýalnamaǵa qatysyp, daýys bergen 1000 adamnyń úni bir jerden shyqqanynyń ózi táýelsiz urpaqtyń sanasy kelmeske ketken "Sovet odaǵyn" qabyldamaıtynyn kórsetedi. Endeshe, keshegi qylyshynan qan tamǵan qyzyl ımperıa qursaýyndaǵy qazaqtyń qanyn sýsha aǵyzǵan Stalınnyń aýyzynan shyqqan bul sózdi(Uly Otan) Alash balasy nege sonsha Qudaı sózindeı kóredi? İİ Dúnıejúzilik soǵys álem halqyn qamtyǵanyn, sol soǵysta quramynda Qazaqstan bar Keńes odaǵynyń jeńiske jetkenin eshkim joqqa shyǵara almaıdy. Alaıda búgingi táýelsiz eldiń urpaǵynyń óz «Uly otany» bar emes pe?! Ol - Qazaq eli. Álde esimizdi ekeý, túsimizdi tórteý qylǵan quldyqtyń qamytyn áli kúnge sheshkimiz kelmeı me? Esterińizde bolsa, İİ dúnıejúzilik soǵystyń 60 jyldyǵy qarsańynda Reseı «Táýelsiz memleketter dostastyǵy úshin barlyǵymyz bir kisideı merekeni atap óteıik!» degende, Baltyq elderi ne dedi? «Uly otandaryńnyń» jeńisin toılaı berińder, «bizdiń Uly otan basqa» dedi de qolyn biraq siltegen. Ólgen-tirilgenine qarmaı, «Otan, otan» dep júrgen sol baıaǵy bizdiń el! Táýelsiz Qazaqstannyń kók týynyń astynda «Uly otan soǵysy» dep urandaýǵa tıispiz be? San ǵasyrlyq táýelsizdik kúresi «Uly otan soǵysynan» kem be? Ult batyry Kenesarynyń basyn ustap otyrǵan sol «Uly otan» emes pe? Iá, İİ dúnıejúzilik soǵysqa qatysqan qarttarymyz bar. Olarǵa páter bersin, kólikte tegin júrgizsin... Kóneniń kózine qandaı syı jasasada eshkimniń qarsylyǵy joq. Ol úshin «Uly otan» dep urpaqty adastyrýdyń qajeti qansha?

Nurzat Toǵjan