Búgin Ekspo nysandary boıynsha ınspeksıalyq saparmen halyqaralyq kórmeler búrosynyń bas hatshysy Vısente Lossertales Astanaǵa keldi. Jýrnalıster bolashaq EKSPO-2017 qurylys alańynda alǵashqy ret bolyp, jumystar qalaı júrip jatqanyn óz kózderimen kórip qaıtty.

Álbette, eń aldymen olar kórmeniń basty nysany – sfera túrinde somdalatyn Qazaqstan Ulttyq pavılonynyń bolashaq ǵımaratyna bardy. Ázirge bunda bolashaq qurylystyń nóldik kezeńi aıaqtalǵan. Dıametriniń kólemi 80 m, al bıiktigi 8 qabatty úıge teń keletin ǵımarat, arhıtektorlardyń oılastyrýynsha Astananyń eń kórikti jerleriniń birine aınalady. Sol sebepti, ol «Baıterek» monýmentimen bir beldeýde ornalasqan.

Sferanyń shyny qabyqshasynyń astynda murajaı men qazaqstandyq pavılon ornalasady. Degenmen de, bulardyń bári – qurlysshylar júzege asyratyn josparlar ǵana.

Tekserýdiń ekinshi nysany kórme uıymdastyrýshylarynyń ǵımaraty boldy. «Astana EKSPO-2017» Ulttyq kompanıasy» AQ basqarma basshysy Talǵat Ermegıaev bul nysandy ýaqytynan buryn qoldanysqa ótkizý josparlanýda ekenin Lossertales myrzaǵa jetkizdi.

 «Jyldyń aıaǵynda aıaqtaýlary kerek edi, biraq biz bunda kúzde kirýdi josparlaýdamyz. Tamyz aıynyń 3-ine qaraı birinshi ǵımaratty usynǵymyz keledi, soǵan baılanysty ary qaraı jumys isteımiz», - dep ulttyq kompanıa basshysy túsindirdi.

«Eger sizder erterek aıaqtasańyzdar, tamasha bolar edi, elderden adamdar kelip, qalaı bolyp jatqandyǵyn kózderimen kórýge múmkindik alady», - dep qazaqstandyq taraptyń bastamasyna Vısente Lossertales qoldaý bildirdi.

Ýaqytsha qurylǵan tóńirekti qaraý alańynyń terezesinen Halyqaralyq kórmeler búrosynyń Bas hatshysy qurylysy júrip jatqan barlyq nysandarǵa kóz júgirtti. Aıta ketý kerek, tóńirekti qaraý alańyn 2015 jyldyń aıaǵyna qaraı alyp tastaıdy.

«Astana EKSPO-2017» basshysy Talǵat Ermegıaev qurylys jumystary kestege sáıkes, sapalylyqty saqtaı otyryp júrgizilýde ekendigin sóz etti.

 «Jarty jylǵa erterek aıaqtaıtyn shyǵarmyz. Osy jyldyń aıaǵyna deıin barlyq ǵımarattar kóteriledi jáne olardyń qasbetterin jaýyp, bir bóligin abattandyrýǵa kúsh salamyz. Iaǵnı ázirlik 70-80% bolady. Barlyq ǵımarattar, barlyq ınjenerlik jeliler... Bizdiń jospar boıynsha kelesi jyldyń basynda ishki árleý jumystaryna kirisýge bolady. Alaıda bunymen qatysýshylardyń ózderi aınalysatyn bolady. Kongres-holl, otel tárizdi nysandar úshin – olarǵa ýaqyt qajet, kelesi 2016 jyldyń jazynda aıaqtaıdy. Óıtkeni daıyndalýǵa, sherýler ótkizýge ýaqyt qajet», - dep atap ótti Talǵat Ermegıaev.

Halyqaralyq kórmeler búrosynyń Bas hatshysy kórgenderine rıza boldy.

 «Qurylys alańyndaǵy uıymshyldyqtan men óte úlken áser aldym. Qurylys kestege saı ǵana emes, odan biraz aldyda kele jatyr. Qurylys jumystarynyń jetistikteri tórt myń jumysshynyń qolynda. Qurylys alańyn óz kózińmen kórgen kezde bári qalaı jasalǵanyn túsiný jeńilirek bolatynyn aıtqym keledi», dep Vısente Lossertales óz áserimen bólisti.

Salynyp jatqan nysandardy kórip bolǵannan keıin Vısente Lossertales EKSPO-2017 jobasy aıasyndaǵy master-jospar, taqyryptyq pavılondar men buqaralyq sharalarǵa ázirlik boıynsha máselerdi talqylaýǵa qatysty. Sondaı-aq, eki kúndik sapary barysynda halyqaralyq kórmeler búrosynyń basshysy birqatar resmı kezdesýler ótkizedi.

Aınur Koskına