Almatyda avtoturaqta júz teńge úshin týyndaǵan janjal jalǵasyn tapty. Avtoturaq qyzmetkerin atyp, jaraqattaǵan júrgizýshi Astana arnasynyń tilshilerine oqys oqıǵa týraly óz shyndyǵyn baıandady.

Bári turaq úshin aqy tólemeýden bastalǵanyn aıtady. Al aqy suraǵandar zańdy qyzmeti týraly kýálikti kórsetpese kerek. Ákimdik ókilderi Almaty qalasynda jol jıegindegi avtoturaqtar úshin, eger tólem termınaldary bolmasa, turǵyndar aqsha tóleýge mindetti emes dep málimdedi.

"Maǵan kelip avtoturaq úshin aqsha tóle, dedi. Men bul jer turaq tegin emes pe, dedim. Ol "men eshteńe bilmeımin, tóle!" dedi. Chek bar ma? Qujat bar, dedim. Joq pa, onda tólemeımin, dep edim. Ol meniń kúrteshemnen ustap, betimnen ura jóneldi", - dep baıandaıdy kúdikti Ivan Hýtor. Kúdikti azamat qarýdy qorǵaný úshin qoldanǵanyn aıtady. Judyryqtyń astynda qalǵan soń, qarýdy alyp shyqqanyn jetkizdi. Eki ret aýaǵa, sosyn avtoturaqshynyń aıaǵyna atqan. Bul áreketimmen ashýly topty toqtatpaq boldym, dep túsindirdi. Biraq tepkiden qutyla almaǵanyn aıtady. Qazir jigit qaralyp jatqan Qarasaı aýdandyq aýrýhanasynyń jaraqat dárigeri Áset Esqulov: "Naýqas 17-si kúni saǵat 22.40 tústi aýrýhanaǵa. Kelip túskendegi shaǵymdary - bas aýrýy, bas aınalýy, esinen tanýy. Qazir emin alyp jatyr, jaǵdaıy ortasha aýyrlyqta. Dıagnozy - jabyq mı jaraqaty, bas mıynyń shaıqalýy", - deıdi. Bul oqıǵaǵa qatysty qala basshylyǵy da túsinikteme berdi. Almaty qalasy tabıǵı resýrstar jáne tabıǵatty paıdalaný basqarmasy basshysynyń mindetin atqarýshy Erkebulan Orazalın: "Aıta ketetin aqparat: Almaty qalasynyń túrǵyndaryna, ózderi biletindeı, jalpy olardyń, eshqaısysy avtomattandyrylmaǵan jaǵdaıda, qyzmetkerlerge júz teńgeden aqshany tóleý mindetti emes", - deıdi.

Al belgili zańger Sergeı Ýtkın osy tóńirekte arnaıy zańnyń joqtyǵy azamattardy adastyryp keletini aıtady.

"Osydan baryp adamdardyń arasynda túsinbeýshilik týyndaıdy. Arnaıy zańnyń joqtyǵynan, júrgizýshi tólemeýim kerek deıdi, al avtoturaq qyzmetkerleri barlyǵy tóleýge tıis deıdi. Eki jaq ta óz talaptary zańdy ekenine senedi. Eger jaqyn arada bul jaǵdaıdy toqtatpasaq, atyspen aıaqtalatyn jaıttar qaıtalana beredi. Óıtkeni jurt tekten-tek aqsha tólegisi kelmeıdi", - deıdi zańger. Almaty ákimdiginiń málimetine súıensek, kóshedegi turaqtardan jınalǵan qarjynyń tek 20 paıyzy qala qazynasyna túsedi. Ótken jyly bul soma 75 mıllıon teńgeni quraǵan. Ákimdik eshkim tóleýge tıisti emes dep aıtqandyqtan, Sergeı Ýtkın osynshama qarjynyń barlyǵy júrgizýshilerden zańsyz jınaldy dep otyr. Al turaq úshin aqy tóleýden bas tartqan Ivan Hýtorǵa baılanysty qylmystyq is qozǵalǵan, tergeý jalǵasýda. Ol qaıtkenmen de, qoǵamdyq orynda qarý qoldandy.