19 naýryz. Qamshy.kz - Búgin 26 sáýirde ótetin kezekten tys Prezıdent saılaýyna úmitker retinde tirkelgen Jarylqap Qalybaı Almaty qalasynda jýrnalıserge arnalǵan baspasóz máslıhatyn ótkizdi. Bul týraly "Qamshy" portaly habarlaıdy.

Buǵan deıin biz portalymyzda "Juldyzdar otbasy" men "Ańyz adam" jýrnaldarynyń bas redaktory Jarylqap Qalybaıdyń QR Prezıdent saılaýyna úmitker retinde tirkelgenin jáne oǵan 23 sáýirge deıin qazaqstandyq saılaýshylardyń 93 myń qolyn jınaý paraǵy berilgendigi týraly jazǵan bolatynbyz. Al búgingi baspasóz máslıhatynda úmitker Jarylqap Qalybaı myrza osy qysqa merzim arasynda daýys berýshilerden qol jınaý prosesi qalaı júrip jatqany, belgilegen mejeniń qansha paıyzy jınalǵany jáne atalmysh saılaýǵa qatysty kútpegen keleńsizdikter men kedergiler týraly jýrnalısterge aıtyp berdi.

Baspasóz jıynyna Prezıdenttikke úmitker Jarylqap Qalybaıdy qoldaýǵa belgili jýrnalıs Ermurat Bapı men Ǵabıden Jákeı, al óner ıelerinen tanymal rejıser Erkin Raqyshev pen akter Erlan Bilál myrzalar ǵana kelip qatysty.

Baspasóz jıynynda sóz bastaǵan Ǵabıden Jákeı Prezıdent Nazarbaevpen óresi teń, naǵyz ıntelektýaldy ultshyl azamat saılaýǵa túskeli otyrǵanyn atap aıtty. Ǵabıden Jákeı  "Respýblıka kóleminde úlken suranysqa ıe qos birdeı jýrnaldy shyǵaryp otyrǵan Jarylqap naǵyz bilimdi, parasatty, kez-kelgen mınıstrliktiń tizginin ustaı alatyn jan-jaqty azamat. Qazirgi qazaq qoǵamy eki sanatqa bólingen. Birinshisi belgili bir laýazymdy oryndarǵa jaıǵasqan - reseıshilder bolsa, ekinshisi - týra osyǵan qarama-qaıshy - ultshyldar. Búgingi kúni sol  arbanyń besinshi dóńgelegine aınalyp bara jatqan ultshyldar birigip, kúsh bolyp Jarylqapty usynyp otyrmyz. Biz lıberaldy qundylyqtardy qoldaımyz. Taza demokratıalyq qoǵam qalyptastyrýǵa kúsh salamyz",-dedi. Al Ermurat Bapı myzra aldaǵy saılaý naýqanyna daıyndyq jumystaryn sóz ete otyryp, Jarylqap Qalybaıdyń  kandıdatýrasyn qoldaýshylardyń qoldaryn jınaý barysynda kezdesip jatqan túrli keleńsizdikterge toqtalyp ótti. Ermurat Bapıdiń aıtýynsha qazirdiń ózinde  uıymdasqan provakatorlar Jarylqap Qalybaıdyń qol jınaý paraqshalaryn búldirip, ondaǵy daýys berýishiniń esimderin  burmalaǵan faktiler de kezdesken. "Tipti, keıbir BAQ-ta arnaıy adamdardyń tapsyrmasymen Jarylqap Qalybaıǵa qatysty provakasıalyq maqalalar da jarıalana bastaǵan",-deıdi Ermurat Bapı.

Jarylqap Qalybaı, "Juldyzdar otbasy" men "Ańyz adam" jýrnaldarynyń bas redaktory:

- Meniń saılaý dodasyna túsýdegi basty maqsatym Qazaqstandy 25 jyl basqarǵan adamdy ornynan qulatý emes. Ol múmkin emes te. Alaıda ózimniń konstıtýsıalyq quqymdy paıdalana otyryp, osy saılaýda halyqtyń kem-ketigin bılikke jetkizý. BAQ arqyly áleýmettiń aldyna shyǵarý. Ultshyldardyń bir múddege uıysqandyǵyn kórsetý. Búgingi kúnde ýaqyt óte qysqa bolsa da, Qazaqstannyń aımaqtarynan kelip qoldaý bildirip jatqandardyń qarasy mol. Oblystar men aýdandardaǵy túrli uıymdar men birlestikterdiń jetekshileri kelip qol jınaý paraqshalaryna toltyryp jatyr. 23 naýryzǵa deıin 93 myń adamnyń qolyn jınaý júktelse, búginge deıin 35 myńnyń ústinde daýys berýshilerdiń qolyn jınap úlgerdik. Bul shamamen 50 paıyzdy qurap otyr. Qazir qol jınaý jumystary qyzý júrip jatyr.  Qudaı qalasa 23 naýryzǵa deıin 120 myńdaı daýys berýshilerdiń qolyn jınaımyz dep josparlap otyrmyz. Eskerte ketetini meniń kandıdatýramdy qoldaýshy elektorattarymnyń 50 paıyzy belsendi jastar. Sondaı-aq, túrli Respýblıkalyq birlestikter men uıymdardyń jetekshileri meniń kandıdatýramdy qoldap otyr. Mysaly, Dos Kóshim aǵamyz bastaǵan "Ult taǵdyry" qozǵalysy, "Memlekettik til" uıymy, "Jýrnalıser qaýymdastyǵy" sekildi birqatar uıymdar qazirdiń ózinde qol jınaý jumystaryna aralasyp otyr. Sonymen qatar, meni qoldaýshylardyń qatarynda Jalpy ulttyq sosıal-demokratıalyq partıasynyń ókilderi men «Nur Otan» partıasynyń músheleri de joq  emes. Osyǵan baılanysty áleýmettik jelilerde "JSDP Jarylqaptyń kandıdatýrasyn usynypty" degen maǵynadaǵy aqparattar jarıalana bastapty. Birinshiden JSDP bul saılaýǵa qatyspaıtynyn, partıa atynan eshbir kandıdat usynylmaıtynyn málimdedi. Biraq, bul partıa músheleri saılaýǵa úmitkerlik usynǵan adamdy qoldamaıdy degen sóz emes qoı. Bul úlken saılaý. Bir eldiń basshysyn tańdaıtyn óte jaýapty is. Bundaı kezde mindetti túrde osyndaı arandatýshy aqparattarmen shabýyldardyń jasalatyny belgili. Osy maqsatpen de men búgin baspasóz máslıhatyn ótkizip otyrmyn.

Nurgeldi Ábdiǵanıuly