Áleýmettik jelilerde qazir «Ózim jaıly 20 fakt» dep atalatyn jańa estafeta paıda boldy. Talap boıynsha, estafetany qabyldaǵan adam ózi jaıly qyzyqty 20 derek jazyp, úsh adamǵa kezekti berýi tıis. Massaget.kz qazaqstandyq juldyzdar jaıly eń qyzyqty faktilerdi jınastyrdy. Ánshi Asel Sádýaqasova Qaraǵandy qalasynda týylyp, balalyq shaǵyn Jetiqara aýylynda ótkizgen. Bolashaq ánshi aýylda úırek baqqan eken. Naǵyz aýyldyń balasy sekildi 15 jyl boıy óristen maldy qaıyrypty. Al ánshi Lıdo bolsa balalyq shaǵynda óziniń ádemi bolmaǵanyn aıtady. Al synybyndaǵy balalar onymen naǵyz er balalarsha óz ortasyna tartyp, dos qylǵan kórinedi. Armani saýda belgisin tanystyrǵan tuńǵysh qazaqstandyq model Alena Sýbbotına bolsa ózine qatty uqsaıtyn egizi bar ekenin jáne onyń da daýsy dál ózinikindeı ekenin jasyrmady. Onyń bala kezindegi qaı sýretin qarasańyz da kúlip turǵan bir de bir beınesi joq eken. Al tanymal telejúrgizýshi, prodúser Asqat Sadyrbaıdyń ákesi mıllıoner bolǵan. Bala kezinde úıinde aqsha qappen jatady eken. Tek táýelsizdiktiń alǵashqy jyldary ákesiniń kásibi toqtap qalypty. Áıgili prodúser Baıan Esentaevany 9 ret jumystan shyǵaryp jiberipti. Al onynshy jumysynda ol óz kásibimen aınalysýdy jón kórgen. Ánshi Móldir Áýelbekova tús kórmeı uıyqtaýdy armandaıdy. Ol ár uıyqtaǵanynda mindetti túrde tús kóretinin jazǵan. Ánshi Merýert Músiráli 20 keli salmaq tastapty. Álı Oqapovtyń balalyq shaǵy tipten shytyrmanǵa toly. Ol bes jyl boıy lagerde tárbıeshi bolyp jumys istegen. Budan basqa, taksıst te bolypty. Al keıin gúl satýshysy bolyp nápaqa taýyp júripti. Aıtysker aqyn Aınur Tursynbaeva aqsha jınaı almaıtynyn, aqshaǵa óte salaq ekenin jaıyp saldy. Biraq ol qonaq shaqyryp nemese ózgelerge syılyq jasaýdan ózine lázzat alady eken. Belgili prodúser Alýa Qonarova bolsa ózi týraly jaman ósek pen ózi týraly jáı sózdiń ózin kótere almaıdy eken. Qansha tyryssa da bul qıyndyqty jeńýdiń jolyn bilmeı keledi eken. Ánshi Baǵym Muhıtdenova bolsa 26 keli salmaq tastaı alǵan! Ol munyń syryn túsindire de almaıdy. Tipti dıeta ustanbaǵan, sportpen aınalyspaǵan, aryqtatatyn eshbir dári de ishpegen kórinedi. Aıýmı tobynyń ánshisi Aıdana Sharıphanova bolsa bala kezinde áskerı adam bolýdy armandapty. Munyń sebebin ol balalardyń arasynda óskenimen túsindiredi.

Massaget.kz