Tabysynan salyq tólemegen ártister endi aıyppul arqalaıdy. Bul týraly Almaty qalalyq kiris departamentiniń basshylary habarlady.

Juldyzdardyń basyn qosyp, jıyn ótkizgen salyqshylar óner adamdaryn óz erikterimen kásipkerlik ashýǵa shaqyrdy. Salyqshylar óner juldyzdaryn jıyp, jeke kásipkerlik ashýǵa úgittemek bolǵan. Alaıda shaqyrylǵan 400-den asa ártistiń nebári 30 shaqtysy ǵana keldi. Dese de, josparly jumysty jalǵastyrǵan mamandar tabysyn jasyrǵan ártister jazasyz qalmaıdy dep otyr. Kimniń qansha paıda tapqanyn dáleldeý úshin aldaǵy ýaqytta toılar men keshterge reıd júrgizip, fırmasy joq óner ıelerine dúrse qoımaq. "Tirkelmegen ártisterge keletin bolsaq, olardyń bizge aty-jóni, bári belgili. Kez kelgen ártisti tekserýge bolady. Tirkelgen-tirkelmegenin kez kelgen ınspektor teksere alady. Eger ártis kásipker retinde tirkelmegen bolsa, olarǵa ákimshilik aıyppul salynady",- dedi Almaty qalalyq kiris departamentiniń bólim basshysy Edil Ázimshaıyq. Qazirgi tańda Almaty qalasy boıynsha kiris departamentine 1 myń 29 óner adamy kásipker retinde tirkelipti. Ótken jyly sonyń 650-i ǵana tabysynan 45 mıllon teńge salyq quısa, 35 paıyzy kiriske kók tıyn da tólemegen. Osyny sóz etken basshylar árbir ártis aıyna "mıllondap tabys tabady" degennen jańylmaı otyr.

Alaıda, án salyp, toı júrgizetinder "shyǵynymyz shash etekten, aılyq jalaqymyz mıllıon túgili, jartysyna da jetpeıdi" dep zar ıleýde.

"Jetkilikti tabys tabatyn áriptesterimmen qatar, óte az tabys kóretinderi de bar. Mysaly, ár toıdan olar 10 myń teńge tabýy múmkin. Eger aıyna bir-eki toı bolsa, ol sonda 30-40 myń teńge tabys tabýy múmkin",- dedi kompozıtor Arman Dúısenov. "Salyqshylar ár keshten 10-15 myń teńge alamyz degen asabalarǵa senbeıdi. Men óz basym 20 myńǵa toı júrgizemin. Artyq tabysyńdy jasyrǵan úshin aıyppul salam deı me? Aldymen sondaı tabys tapqanymdy dáleldesin",- dedi asaba Elena Opýhtına. Salyqshylardyń esebinshe, Almatyda 3000-nan asa óner juldyzy turady. Onyń ishinde tanymaly da, shoý-bızneske endi qadam attaǵandary da bar. Sol sebepti quzyrlylar asaba, bıshi, tipti saıqymazaqtardyń jeke kásipker bolýyn mindettep otyr.