Chelsı Verner – sánbıke jáne sportshy. Ol ózge áriptesterine uqsamaıdy. Chelsı Daýn sındromymen dúnıege kelgen. Bul dıagnoz adamnyń múmkindigin shekteıdi.

Dárigerler Verner otbasyn Chelsıdiń densaýlyǵynda kinárat bolatynyn eskertken. Bul dıagnoz ómirde jetistikke jetýge kedergi bolatynyn aıtqan.

Alaıda Chelsı Daýnmen týǵan balalarǵa qatysty barlyq túsiniktiń kúl talqanyn shyǵardy. Chelsı zor jetistikke jetti jáne onymen toqtap qalmaq emes.

Chelsı Verner bul ómirde múmkin emes nárse joq ekenin dáleldedi. Ózgelerge demeý berip, Daýnmen dúnıege kelseń de armandaryńdy júzege asyrýǵa bolatynyn kórsetý úshin óz oqıǵasymen bólisti.

Chelsı – gımnastıkadan ulttyq arnaıy Olımpıada chempıonaty men eki márte álem chempıonatynda jeńiske jetti. Jeńistiń tátti dámin sezý úshin talmaı eńbek etýge týra keldi. Chelsı bir elementti naqyshyna keltirip oryndaý úshin birneshe jyl toqtaýsyz daıyndaldy. Onyń jyldap úırengenin densaýlyǵynda kinárati joq  gımnasshylar birneshe aıda ıgerip alatyn.

Mekteptegi sport toptary ony qatarlaryna qosqysy kelmedi. Sebebi Chelsıdiń fızıkalyq múmkindikteri joǵary nátıjege jetýge kedergi bolady dep oılady. Osyǵan qaramastan Chelsı armanynan bas tartpady. Arman shynaıy ómirde kórinis taýyp, maqsatqa qol jetkizý úshin tabandylyq qajet dep beker aıtylmasa kerek. Ózine degen senimin joǵaltpaǵan Chelsı jaqsy jattyqtyrýshy tapty. Deın Pombo qyzdy myqty gımnasshy qylý úshin qolynan kelgenin aıap qalmady.

Chelsı tájirıbeli sportshylarmen básekeles bolady dep eshkim oılamady. Ol Pombonyń basshylyǵymen alǵashqy altyndy jeńip aldy. Qajyrly eńbek pen talmas qanat eskerýsiz qalmady!

- Daýn sındromymen dúnıege kelgen balasy bar ata-analar meniń ómirim olarǵa úmit syılaǵanyn aıtqanda qýanamyn, deıdi Chelsı.

Qaısar qyzdyń kelesi armany sánbıke bolý edi. Alaıda onyń dıagnozy adamdardyń oǵan kúmánmen qaraýyna túrtki boldy. Kóbi Chelsıge Daýn sındromy barlarǵa sán álemi máńgilikke jabyq ekenin túsindirýge tyrysty.

Biraq Chelsı armanyn oryndaýdyń jolyn tapty. Ol Nú-Iorktegi "We Speak" agenttigimen jumys isteı bastady. Áıelderdiń ózine degen senimdiligin arttyrýǵa baǵyttalǵan «Body positive» kompanıasynyń túsirilimderine qatysty.

Chelsı Verner – jigerli adamnyń úlgisin kórsete bildi. Dıagnozy maqsatqa jetýge kedergi keltirýine jol bermedi. Armanynan bas tartpady.

«Barlyǵynda qıyndyqtar bolady. Mańyzdysy ony qalaı jeńildetetinińizde» deıdi Chelsı Verner.