Mektepti bıyl ǵana támámdaǵan túlekter «Altyn belgi» tósbelgilerin ınternet saýda jelilerine saýdaǵa qoıǵan. Onyń baǵasy 350 myńnan bastap, jarty mıllıon teńgege deıin jetedi. Odan bólek, tilshilerimiz zertteý júrgizip, elimizdiń kez-kelgen joǵary oqý ornynyń dıplomyn satýshylardy da tapty. Olar qalaı zańsyz áreketin jelide ońaı júzege asyrýda?. Jalpy elimizde aqshasyn tólep qandaı marapatpen, medaldi ıelenýge bolady? Bul týraly Eýrazıa birinshi arnasy habarlaıdy.
Talaıǵa arman bolǵan «Altyn belgi» tósbelgisin ala-almasańyz qam jemeńiz. Endi ony ınternettegi saýda jelilerinen ońaı satyp alýǵa bolady. Ótken oqý jylynda tapsyrylǵan medaldar 500 myń teńge bolsa, budan tórt-bes jyl buryn berilgenderi 350 myńdaı turady eken. Ony satýǵa qoıǵandardyń biri habarlandyrýdy Jarkent qalasynan júktepti. Oǵan habarlasqanymyzda, tósbelgini májbúrlikten satýǵa qoıǵanyn aıtyp qaldy.
«Atestat barlyǵy bar. Baýyrlarymnyń biri qatty aýyryp qaldy. Emdeýge aqsha kerek. Osy sebepti satýǵa qoıdym» - deıdi Jarkent qalasynyń turǵyny Narıman.
Al taǵy bir habarlandyrýdy bergen boıjetken "Altyn belgini" óz bilimimen alǵanyn aıtady. Biraq, joǵarǵy oqýǵa túskennen keıin ol kerek bolmaı qalǵan.
«Men ony jaı satýǵa qoıdym. Ózime qajeti joq. Stýdent bolǵannan keıin júrip-turýyma aqsha kerek» - deıdi Atbasar qalasynyń turǵyny Tatána.
Sondaı-aq ınternetten taǵy bir qyzyq habarlandyrýdy kórip qaldyq. Onda keıbir pysyqaılar kez-kelgen oqý ornynyń dıplomyn alyp bere alatyny týraly jazypty. Árıne, aqshasynda tóleısiz. Onyń qasynda ras-ótirigi belgisiz satyp alǵandardyń da pikirlerin júktep qoıǵan. Biraq, olardyń kórsetken telefon nómirine habarlasa almadyq. Al ol dıplomnyń ıegeri atanǵandardyń da aty-jóni kórsetilmegen.
«Ol tórt jyl saraptap, sonyń leksıasyna qatyspasa, sonyń otymen kirip, kúlimen shyqpasa, ol mamandyqty jany súıip qyzyqpasa... Ol erteń qandaı maman bolady kókem-aý? Ol dıplomdy alyp alǵan soń jumys isteý kerek qoı. Ol óziniń mamandyǵynyń ıesi bolmasa. Ol oǵan qyzmet istemeıdi. Sondyqtan pálen aqshaǵa sata berý degen ol jaqsylyqtyń nyshany emes ol» - deıdi jýrnalıs, jazýshy Jumamurat Shámshi.
Buǵan deıin jańalyqtarymyzda, «Qazaqstannyń qurmetti» azamaty degen medaldiń da satylatynyn aıtqan edi. Sońǵy úsh jylda ony 150 adam alypty. Qatarynda elge esimi belgili sheneýnikter men estrada juldyzdary, qarapaıym azamattar da bar. Biraq, olardyń eshbiri bul marapatty satyp alǵanyn aıtqysy kelmeıdi.
«Menen eshkim eshteńe suraǵan joq» - deıdi «Tabıǵat» ekologıalyq odaǵynyń tóraǵasy Mels Eleýsizov.
Biraq «Qazaqstannyń qurmetti azamaty» degen medal 1 mıllıon 750 myń teńge ekenin uıymdastyrýshylardyń ózi moıyndaıdy. Al ony úlestirýshi memlekettik emes, reseılik uıym. Halyq Qaharmany Toqtar Áýbákirov bul úlken ataqty saýdaǵa salǵandardyń isin qylmysqa teńegen bolatyn.
«Qazaq halqynyń qurmetti azamaty bolý úshin bir eki kisi ony sheship, sol ataqty satqan degen ol baryp turǵan qylmys. Ony berý úshin parlamenttiń sheshimimen, prezıdenttiń jarlyǵy bolýy kerek» - deıdi ǵaryshker, halyq qaharmany Toqtar Áýbákirov.
Elimizde satyp alýǵa bolatyn taǵy bir dúnıe ol - Áskerı bılet ekeni aıtylady. Azamattyq boryshyn ótegisi kelmegender áýre bolmaı-aq aqysyn tólep, ony ala-alady. Ol úshin Qorǵanys mınıstirliginiń 40 kúndik oqytý kýrsyna 263 myń tóleseńiz jetkilikti. Bul kúmándi basylymdar emes, mınıstirliktiń ózi jarıalaǵan resmı aqparat.
