Eki aı buryn Almaty turǵyndarynyń nazaryn túgeldeı ózine aýdarǵan "ǵajap" týyndy – alyp tıin jaıly búgin taǵy aıtyldy. Aıtqan qalanyń basshysy Baýyrjan Baıbek. Bul jolǵy sózi almatylyqtardy taǵy shýlata ma álde tıinniń kórkemdigin aqyry túsinýge septigin tıgizer me eken, bilmedik. Áıteýir ákim búı dedi:  

«Almatydaǵy tıin jaıly álemdik BAQ jarıalady – BBC, Fox News, New York Post, buǵan qosa reseılik mass-medıa da únsiz qalmady. Endigi qalamyzǵa kelgen týrıser de birinshi kezekte tıinniń qaıda ekenin suraıdy. Kórgisi keledi. Tipti elimizdiń ózge qalalarynan kelgen qonaqtarymyz da buryn-sońdy «Shymbulaq» pen «Medeýge» asyǵyp turatyn edi, qazir tıindi kórýge jınalatyn boldy», - degen Baıbek músinge jumsalǵan 23 mıllıon teńgeniń ózin-ózi tolyq aqtaǵanyn tilge tıek etti. 

Onyń ústine ákim almatylyqtardan dál osyndaı reaksıany kútken eken.

«Shyn mánisinde biz turǵyndardyń reaksıasyn aldyn-ala boljadyq. Tıin almatylyqtardyń jańa, tyń dúnıelerdi qabyldaı alýyna úıretken ındıkator boldy. Ári tıin almatylyqtardyń minezin aıqyndap turady – únemi qozǵalysta, qamqorlyqta, dál siz ben biz sekildi.

Joba avtorlarynyń sózinshe, tipti tıinniń alyptyǵy da qala turǵyndarynyń minezi sekildi. Biz únemi asyra aıtýdy jaqsy kóremiz, túımedeıdi túıedeı etemiz de turamyz. Taǵy bir aıta keterligi, tıin – taza aýa, taza sý, jasyl jelek. Ol tabıǵatta ómir súrgendi súıedi. Naǵyz Almatyǵa tán janýar. Muny baıqaı bilgenimiz jón», - dep qorytyndylady sózin ákim.

Esterińizge sala keteıik, almatylyqtardyń synyna aınalǵan alyp tıinniń músini «Atakent» kórmesiniń aldynda shildeniń basynda paıda bolǵan edi. Anyqtalǵandaı tıindi jasaý úshin memlekettik jáne jobany uıymdastyrýshy kompanıanyń búdjetinen jalpy 23 mıllıon qarajat ketken. Joba avtory sýretshi Aleks Rınsler ekenin de taǵy bir aıta keteıik.