Aqtóbedegi jalpy rejımdegi kolonıada Azattyqqa tutqyn 28 tamyz kúni etappen kelgender arasynda Maks Boqaevtyń bolmaǵanyn, al kelesi etap endi 10 qyrkúıekten keıin ǵana keletinin málimdedi.

Vadım Kýramshınniń aqparaty boıynsha, 45 jastaǵy Maks Boqaev qazir Qaraǵandynyń tergeý abaqtysyndaǵy aıdaýǵa jóneltiletin pýnkte otyr. Alaıda, Qaraǵandydaǵy tergeý abaqtysyndaǵylar buǵan qatysty qandaı da bir aqparat berýden bas tartty.

Maks Boqaevtyń qaryndasy Janargúl Boqaeva Azattyqqa týystaryna aǵasynyń Petropavldan Aqtóbege aýystyrylǵany týraly habarlama kelmegenin aıtty. Ol 76 jastaǵy anasy Rahıla Qojasovamen birge 22-24 tamyz aralyǵynda Maks Boqaevpen uzaq ýaqyt kezdesýde bolǵan.

Janargúl Boqaeva aǵasynyń densaýlyǵy birqalypty ekenin aıtady. Birneshe apta buryn túrme ákimshiligi Boqaevqa "ekinshi dárejeli teris minez-qulyq kórsetti" degen baǵa bergen. Qaryndasynyń sózinshe, buǵan Maks Boqaevtyń túrmedegi tekserý kezinde bas kıimin sheshpeı qoıýy sebep bolǵan. Janargúl Boqaeva anasy ekeýi Maks Boqaevty Aqtóbege aýystyrý týraly túrme ákimshiligimen, ıa aǵasymen sóılespegenin aıtady.

Maks Boqaevqa buǵan deıin de "úshinshi dárejeli teris minez qulyq kórsetti" degen baǵa berilgen. Ol bıylǵy qańtarda 2017 jylǵy jeltoqsan aıynda túrmede 25 gradýs sýyqta tańǵy dene shynyqtyrýdy jasaýdan bas tartqany úshin alty ret jazaǵa tartylyp, tártiptik oqshaýlaý kamerasyna qamalǵan.

Maks Boqaev 2016 jylǵy Atyraýdaǵy asa aýqymdy jer reformasyna qatysty mıtıńilerden soń bes jylǵa sottalǵan. 2016 jylǵy 28 qarashada Atyraý qalalyq №2 soty Boqaevtyń jazasyn Atyraýdaǵy ÝG 157\9 mekemesinde óteýdi belgilegenimen, 2017 jylǵy 27 qańtarda ol Soltústik Qazaqstan oblysyndaǵy ES -164\3 mekemesine jóneltilgen. Sodan beri Maks Boqaev ta, onyń týystary da bul aýystyrýmen kelispeı, birneshe márte aryzdanǵan, alaıda sot bul aryzdardy qanaǵattandyrmaǵan.