Keshe Qazaqstan Respýb­lıkasy Parla­menti Senatynyń depýtattary Tóleýbek Muqashev pen Dınar Nóketaeva «Almaty aqshamy» gazetiniń redaksıa­synda qonaqta bolyp, ujymdy 30 jyldyq mereıtoıymen quttyqtady.

Basqosýdyń kirispe sózinde «Almaty aqshamy» gazeti JSHS-niń Dırektory–Bas redaktory Qalı Sársenbaı arnaıy kelgen qurmetti qonaqtardy basylymnyń tarıhymen tanystyrdy. Búgingi tańda basylymnyń kóterip júrgen taqyryptarynyń mańyzdylyǵyna toqtalyp, redaksıanyń qazirgi tynys-tirshiliginen de az-kem áńgimelep berdi. Sonymen qatar, aqparat quraldarynyń qazirgi qoǵamda úlken mańyzǵa ıe ekendigin aıtyp, qonaqtarǵa ujymdy tanystyrdy.

– «Myń jasaǵan shahardyń shamshyraǵy – «Almaty aqshamy» gazeti  aqparat aıdynynda ózindik ornyn taýyp, qazirgi tańda zıaly da ultjandy azamattardyń, qarapaıym qala turǵyndarynyń rýhanı-mádenı serigine aınala bildi. Basylymnan rýh lebi esedi. Shyǵarmashylyq deńgeıin únemi ushtap otyratyn basylym óziniń 30 jyldyq mereıtoıyn laıyqty bıiginde qarsy alyp otyrǵanyna senimdimin», – dep  atap ótti Senat depýtaty Dınar Nóketaeva.

Al Senat depýtaty Tóleýbek Muqashev eldiń oı-óresin kóteretin eń áýeli baspasóz ekenin tilge tıek etti.

– Qazirgi tańda baspasózdiń máni de, mańyzy da arta tústi. Gazet ujymdyq nasıhatshy, qoǵamdyq pikir týǵyzýshy, qala berdi  qoǵamdyq oıdy qozǵaýshy kúsh. Osy rette jýrnalıserdiń qalam silter taqyryp­tarynyń aıasy Elbasy Nursultan Nazarbaev jıi aıtatyn ıntellektýaldy ult qalyptastyrýǵa, eldiń rýhanı deńgeıin kóterýge septigin tıgizetin maqalalardy kóbirek jazsa degen tilek bildiremin, – dedi ol.

Sonymen qatar, kezdesýde Senat depýtattary basylym ujymymen salıqaly áńgime órbitip, Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn halyqqa nasıhattaý baǵytynda júrgizilip jatqan birqatar sharalar týraly áńgimelep berdi.

– Elbasynyń «Bolashaqqa baǵdar: rýhanı jań­ǵyrý» atty maqalasy –  ultymyzdyń barlyq  salt-dás­túrlerin, memlekettik til, ádebıetimiz ben mádenıetimizdi, ulttyq rýhymyzdy jańǵyrtý kerek degen asyl uǵymǵa kelip saıady. Elbasymyzdyń rýhanı jańǵyrýǵa, rýhanıatqa, bilim men ǵylymǵa mańyz berýi – úlken kóregendik, – dep atap ótti Tóleýbek Muqashev.

Depýtattarmen bolǵan kezdesýde Almaty qala­synyń elimizdegi barlyq salada alda ekendigine qatysty kóp áńgimeler aıtyldy. Sonymen qatar, qazaq rýhanıatynyń ózekti máseleleri, mádenıettiń qoǵamdyq ómirdegi orny keńinen talqylanyp, ulttyq rýhanı qundylyqtardy saqtaý, kóterý qajettigi sóz boldy.