Ulttyq kitaphanada Áset Beıseýovtiń 80 jyl­dyq mereıtoıyna  oraı  «Júregi án dep soǵatyn» atty kitaptyń tusaýkeser rásimi ótti. Ásem ánmen árlengen izgi sharaǵa esimi elimizge belgili mádenıet jáne óner qaıratkerleri, aqynnyń týǵan-týystary men ónersúıer qaýym qatysty. Taǵylymǵa toly sharany Qazaqstannyń eńbek sińirgen qaıratkeri, «Almaty aqshamy» gazetiniń Bas redaktory Qalı Sársenbaı júrgizdi.

Qarymdy qalamger Tursynbek Eshen­qulov qurastyryp, daıyndaǵan  «Júregi án dep soǵa­tyn»  kitaby kompozıtor, Qazaq­stannyń halyq ártisi, lırıkalyq ánderimen ár adamnyń júregine sazdy áýenniń tunyq bulaǵy bolyp quıylǵan Áset Beıseýov týraly. Kitapta Á.Beıseýovtiń zamandas­tary, aǵa-inileri, ápke-qaryndas­tarynyń estelikteri, Qazaq radıosy­nyń «Altyn qorynda» saqtalǵan ánderiniń tizimi toptas­ty­rylǵan. Kompozıtorǵa arnalǵan kitap «ARNA-B» baspasynan jaryqqa shyqqan. 

İzgi sharany júrgizgen Qalı Sársenbaı kitaptyń qundylyǵy men ereksheligine toqtalyp ótti.

– Oqyrmanǵa jol tartqan bul kitap Almaty qalasy­nyń ákimi Baýyrjan Baıbektiń tikeleı tapsyrmasymen, Mádenıet basqarmasynyń qoldaýymen jaryqqa shyqty. Kitapty qurastyrǵan, Áset Beıseýovpen birge ǵumyr keshken, jastyq shaǵyn birge ótkizgen qazaqtyń qarymdy qalamgeri Tursynbek Eshenqulovqa alǵys aıtamyz. Dostyń da dosy bar. «Bir dos bar qıa betkeıge deıin, bir dos bar qıametke deıin» deıdi qazaqta. Halqymyzda talantty adamdar az emes. Áset Beıseýovtiń ánderi, árıne, umytyl­maıdy, halyq aıtady, qazaq aman bolsa, jasaı beredi. Alaıda, talantty tulǵanyń ómirde bir joqtaýshysy bolýy kerek. Osy oraıda, Tursynbek Eshenqulovtyń tirnektep júrip, irgeli is tyndyrǵanyn atap ótkenimiz abzal. Áset Beıseýovtiń ár ániniń ózi bir spektákl deýge bolady. Án­deriniń barlyǵy tańdamaly. Bul kitapta Áset Beıseýovtiń bolmys-bitimi, beınesi somdalǵan, adamgershilik asyl qasıetteri aıtylǵan. Kitapta Áset Beıseýovtiń Qazaq radıo­synyń «Altyn qorynda» saqtalǵan 320-dan astam ánderiniń tizimi berilgen. Bul óte qundy málimet bolyp tabylady. Bul kitaptyń qundylyǵy men ereksheligi ekeni sózsiz, – dedi  Qalı Sársenbaı.

İzgi sharada sóz alǵan mádenıet jáne óner qaırat­kerleri Áset Beıseýovtiń qazaq ónerin órkendetýdegi ornyn, kitaptyń rýhanı mańyzdylyǵyn aıryqsha atap ótti.