Elbasymyz N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda ótken «IýNESKO klýbynyń úshinshi «Akademıalyq shyǵarmashylyq» atty óner merekesiniń qorytyndy keshi P.I.Chaıkovskıı atyndaǵy Almaty mýzykalyq kolejinde ótti. Qazaq óneriniń bıik shyńy atanǵan Ermek Serkebaev atyndaǵy úlken zalda ótken konsert jas ónerpazdarǵa rýhanı serpilis, óner álemine degen erekshe baǵyt berdi.

Shyn máninde, qaıtalanbas óner ıesi atyndaǵy zaldyń sahnasyna shyǵyp, óner kór­setýdiń ózi zor mártebe. Osymen úshinshi márte ótkizilip otyrǵan bul joba eń alǵash ret 2016 jyly qolǵa alynǵan edi. Jobanyń tikeleı qoldaýshylary IýNESKO klýbtary men Qazaqstan Respýb­lıkasy Tuńǵysh Prezıdent-Elbasy qory.

Bıylǵy jobaǵa qatysýǵa 12 men 17 jas aralyǵyndaǵy 1000-ǵa jýyq qatysýshy ótinish bildirgen edi. Bul sharaǵa elimizdiń 14 ob­lysy men 124 IýNESKO klýb­tary qamtyldy. Barlyq úmit­kerler ózderiniń týyndylaryn, eń úzdik degen jumystaryn baıqaýǵa joldaǵan edi. Ádil­qazylar bes atalym boıynsha barlyq úmit­kerler joldaǵan jumystardy saralaı kele, eń úzdik dep tanylǵan 80 stýdentti anyqtap, Almatyǵa shaqyrdy.

– Elimizde jastardy qoldaýǵa baǵyttalǵan jobalar óte kóp. Bizdiń basty maqsatymyz – elimizdiń erteńi bolar jastardyń tanylýyna jol ashý, – deıdi QR Tuńǵysh Prezıdenti qorynyń dırektory Sergeı Tohtarov.

Jas talanttardyń barlyǵy ónerli. Olardyń bir-birinen bólip qaraý esh múmkin emes. Talaı daryndy, qazaq óneriniń maqta­nysh­tary óner kórsetken sahnada tusaýy kesilgen jas­tardyń arasynan  áli talaı shoq jul­dyzdardyń shyǵatyny anyq. Jas ónerpazdar bes atalym boıynsha óz ónerlerin kórsetti. Úlken dáliz tórinde jas boıaý sheber­leriniń kórmesi uıymdas­tyryldy.

Qazaqstandyq Ulttyq IýNESKO klýbtary federasıa­synyń bas hatshysy Sabına Aqjarovanyń aıtýynsha, «Shy­ǵar­mashylyq akademıa» talantty balalardyń óner álemine nyq qadam jasaýyna múmkindik týǵyzyp otyr. Óıtkeni, tegin ári oǵan ótinish bildirgenderdiń báriniń qatysýlaryna bolady. Almatyǵa elimizdiń barlyq óńirinen kelgen ónerli jastar túrli leksıalar, semınarlar men trenıńterge qatysyp, ózderiniń tanym dúnıelerin keńeıtti. Ásirese, T.Júrgenov atyndaǵy óner akademıasy men P.Chaı­kovskıı atyndaǵy mýzyka ýchılıshesiniń pedagogtarynyń dáristeri erekshe áser etti.