QTQJB basshylyǵynyń pikirinshe, ekinshi deńgeıli bankterge shartty depozıt salý baǵdarlamasy jylyna aýdany júzdegen myń sharshy metr bolatyn áleýmettik turǵyn úı qurylysy kólemin arttyrýǵa septigin tıgizetin bolady. – Bank jelisimen «Qoljetimdi turǵyn úı – 2020» baǵdarlamasy boıynsha qurylys kólemin arttyrý úshin, memleket qosymsha 30 mlrd teńge bóledi. Biz óz qarajatymyzdyń esebinen taǵy da 20 mlrd. teńge bólýge jáne ony nebári jyldyq 3%-ben depozıt retinde EDB-ge ornalastyrýǵa ázirmiz. EDB bolsa, bul qarajatty 7 paıyzdan aspaıtyndaı etip, Baǵdarlamaǵa qatysatyn qurylys salýshylarǵa kredıt retinde berýi tıis, – dep, QTQJB Basqarma Tóraǵasynyń orynbasary Erbol Qarashúkeev Baǵdarlamanyń mán-jaıyn ashyp kórsetip berdi, –2014 jyly QTQJB jelisimen 429,3 myń sharshy metr paıdalanýǵa berildi. Qurylysqa jeńildikpen kredıt berý baǵdarlamasy buǵan qosymsha taǵy da 120-130 myń sharshy metr áleýmettik turǵyn úı salýǵa kómekteser edi. QTQJB tanystyrǵan Baǵdarlamaǵa bıznesmender men saıasatkerler mynadaı baǵa berip otyr. - Eger bankter tábetinen tartynyp, marjasyn eki paıyzǵa shektese, jaman bolmas edi, – deıdi «Baur Kazakhstan» AQ prezıdenti Saken Shakırov, – QTQJB EDB-ge 3%-ben depozıt ornalastyrady. Qurylys kompanıalary úshin 5% jaman emes... Munyń áleýmettik áseri de baıqalady. Qarjylandyrý da arzanyraq bolady. Bul – kredıttik aýyrtalyq. Ol ózindik qunǵa táýeldi.. Belgili bir sebeptermen aty-jónin jasyryp qalǵan qurylys kompanıasynyń bir ókili mynadaı pikir aıtty: - Áriptesterim meni keshire jatar. Biraq biz udaıy «qurylysshylarda aqsha joq» dep, arzan kredıt suraımyz. Mine, bizge mynadaı múmkindik usynyp jatyr. Biraq biz... áli de shaǵym aıtyp júrmiz! Ras, bızneske jaqsy paıda kerek! Alaıda búkil el daǵdarysqa daıyndalyp jatqanda, halyqqa bet buryp, memleketimizdi qoldaýymyz kerek. Biz mundaı jaǵdaıda jumys isteýge ázirmiz. «Nurly jol» baǵdarlamasy boıynsha qurylys salýǵa da daıynbyz. Bul baǵdarlama depýtattardan da qoldaý taýyp jatyr. - Jalpy alǵanda, mundaı qadamdardy qoldaý kerek. Óıtkeni, nusqalar qanshalyqty kóp bolsa, olardyń ishinde jemis beretinderi de sonshalyqty mol bolmaq, - deıdi Qazaqstannyń «Aq jol» DP tóraǵasy Azat Perýashev, – Ókinishke qaraı, búgingi kúnge deıin qoldanylyp kelgen quraldardyń deniniń muqtaj adamdardy turǵyn úımen qamtamasyz etýde asa nátıjeli bolmaǵanyn kórip otyrmyz. Sondyqtan bul máseleni sheshýge múmkindik beretin ártúrli quraldardy, ártúrli ádisterdi qýana qoldap, is-júzinde olardyń qalaı jumys isteıtinin baıqap kórýimiz kerek.