"Amandyq myrza, aýylyńyzdy kim tonap júr" degen materıal búgin "Qamshy" betinen jaryq kórgen bolatyn. Qalamy qarymdy jýrnalıs Sansyzbaı Nurbaba Almaty oblysy Eńbekshiqazaq aýdanyna qarasty Sógeti aýyly turǵyndarynyń sý qubyry máselesi boıynsha dúrligip jatqanyn, jergilikti qazaqtyń naz-ókpesin oblys ákimi Amandyq Batalovqa jetkizýdi paryz dep bilipti. Biz de malmen kún kórip otyrǵan halyqtyń janaıqaıyn joǵary jaqtaǵylarǵa jetkizý jolynda sebepker bolýdy jón dep sheshtik. Qýanyshymyzǵa oraı, Almaty oblysy ákiminiń baspasóz hatshysy Ǵalymurat Júkel redaksıa poshtasyna atalmysh maqalaǵa qatysty jaýap jiberip otyr. Ony oqyrman nazaryna usynamyz:

"Sógeti aýyldyq okrýgi ákimi apparatyna 2018 jyldyń shilde aıynyń 28 kúni aýyl turǵyndarynan mal sýǵarýǵa arnalǵan sý qubyrlarynyń bólshektenip shyǵarylǵany týraly aqparat tústi. Atalǵan másele boıynsha aýyldyq okrýg ákimi apparatynyń qyzmetkerleri, jergilikti ýchaskilik ınspektormen birge orynǵa shyǵyp, 800 metr sý qubyrlarynyń qazylǵandyǵyn anyqtady. Sol ýaqytta, zańsyz jasalǵan áreket boıynsha akt ázirlenip, barlyq aqparattar polısıa bólimshesine tapsyryldy. Ýaqytsha saqtaý úshin atalǵan qubyrlar aýyldyq okrýgi ákimimen alyndy, İshki ister bólimine aryz berildi.

Anyqtalǵan jaıt boıynsha polısıa bólimshesimen sotqa deıingi aldyn-ala tergeý jumystary júrgizildi. Alaıda, belgisiz azamattarmen qubyrlardy qaıta bólshektep alý áreketi qaıtalandy. Bul tusta aýyldyq okrýg ákimimen 2018 jyldyń 12 qyrkúıeginde ishki ister organdaryna qaıta aryz berilip, qubyrlardy qazýǵa qatysty júrgizilip jatqan jumystardy toqtatý boıynsha shara qabyldandy.

Qazirgi ýaqytta zańsyz qubyrlardy bólshektep alý boıynsha júrgizilgen jumystar toqtatylyp, atalǵan jaıttyń uıymdastyrýshylaryn jáne qylmystyń múshelerin ustaý boıynsha İshki ister organdarymen arnaıy is-sharalar ótkizilýde. Kórsetilgen zalal áreketter boıynsha, sonymen qatar jerdi qalpyna keltirý jumystary aıypty jaq tarapynan qarastyrylatyn bolady".