Aqtaý qalasynyń 32 A yqshamaýdanynan 400 otbasy Turǵyn úı qurylys jınaq banki jelisi boıynsha «Qoljetimdi turǵyn úı – 2020» baǵdarlamasymen salynǵan páterlerdiń kiltin aldy. Jyl sońyna deıin  QTQJB jelisi boıynsha Baǵdarlamaǵa qatysýshylar úshin 120 jáne 670 páterli taǵy da eki úıdiń qurylysyn aıaqtaý josparlanyp otyr. Saltanatty jıynǵa Mańǵystaý oblysynyń ákimi Alık Aıdarbaev jáne «Qazaqstannyń turǵyn úı qurylys jınaq banki» AQ Basqarma Tóraǵasynyń orynbasary Erbol Qarashúkeev qatysty. - Byltyr Mańǵystaý oblysynda 587 myń sharshy metr turǵyn úı paıdalanýǵa berildi. «Qoljetimdi turǵyn úı – 2020» baǵdarlamasy aıasynda 492 otbasy jańa páterge ıe boldy. Bıyl jas otbasylarǵa arnalǵan 60 páterli eki úıdiń, 32 «A» yqshamaýdanynda Turǵyn úı qurylys jınaq banki jelisi boıynsha «halyqtyń barlyq sanatyna arnalǵan» 120 páterli turǵyn úıdiń, úıdiń kezeginde turǵandarǵa 120 páterli úsh úıdiń, «Aqqý yqshamaýdanyndaǵy ekinshi kezektegi úılerdiń qurylysy  aıaqtalady. Sondaı-aq memlekettik baǵdarlama boıynsha salynatyn «Aqqý» yqshamaýdanyndaǵy úshinshi kezektegi úılerdiń jáne 34 yqshamaýdanda 60 páterli úılerdi salý josparlanyp otyr. Biz mańǵystaýlyqtardyń bárin túgeldeı qoljetimdi ári sapaly turǵyn úımen qamtasyz etýge tıispiz, – dedi Mańǵystaý oblysynyń ákimi Alık Aıdarbaev. Elbasy jarıalaǵan «Nurly jol» JES júzege asa bastaǵanda, qoljetimdi baspanamen qamtamasyz etýge basa nazar aýdarylatyn bolady. Máselen, QTQJB jelisimen áleýmettik turǵyn úı qurylysyn der kezinde bitirý úshin, 2015 jyly Ulttyq qordan qosymsha 30 mıllıard teńge bólinbek. - Elimiz úshin asa mańyzdy oqıǵa – Prezıdent saılaýy qarsańynda Jańa qonys ıeleri jańa ómirdi bastamaq, - dedi, QTQJB Basqarmasy tóraǵasynyń orynbasary E. Qarashúkeev, – Biz qazirgi Prezıdent jarıalaǵan «Nurly jol» jańa ekonomıkalyq saıasatyn  qoldaımyz. Onyń basty baǵyty – azamattardy qoljetimdi baspanamen qamtamasyz etý. Bıyl tek qana Turǵyn úı qurylys jınaq banki jelisimen salynyp jatqan qurylystardyń ýaqtyly aıaqtalýy úshin  Úkimet Ulttyq qordan qosymsha 30 mıllıard teńge bólip otyr. Júzdegen qazaqstandyq otbasynyń kópten kútken qonys toıyn toılaýy úshin, biz, ákimdiktermen birge, qolymyzdan kelgenniń bárin jasaıtyn bolamyz, – dep túıindedi Qarashúkeev. Bıyl elimizde «Halyqtyń barlyq sanatyna arnalǵan turǵyn úı» baǵytymen 301,7 myń sharshy metr úıdiń qurylysyn aıaqtaý josparlanyp otyr. Alaıda, jergilikti atqarý organdarymen jasalǵan kelisim boıynsha,  2015 jyly aýdany 400 myń sharshy metr bolatyn turǵyn úı paıdalanýǵa berilmek. Bul jospardaǵydan 100 myń sharshy metrge artyq. Al «Jas otbasyǵa arnalǵan turǵyn úı» baǵyty boıynsha 191, 7 myń sharshy metr salynýǵa tıis. 2015 jyldyń 1 qańtarynan bastap «Qoljetimdi turǵyn úı – 2020» baǵdarlamasy keshendi «2020 jylǵa deıin óńirlerdi damytý baǵdarlamasynyń» bir bóligine aınaldy. Jańa qujat aımaqtar men iri aglomerasıalardy keshendi túrde damytýǵa múmkindik beredi. Esterińizge sala ketsek, «Qazaqstannyń turǵyn úı qurylys jınaq banki» AQ «Báıterek» Ulttyq basqarýshy holdıńiniń» enshiles kompanıasy bolyp tabylady. Holdıńtiń maqsaty – ekonomıkanyń damýyna jáne ártaraptandyrýǵa yqpaldastyq jasaý, klasterlerdi damytý jáne  onyń enshiles uıymdarynda korporatıvti  basqarý júıesin jetildirý.