Eńbek túbi bereke ekendigi beseneden belgili. Degenmen de sońǵy onjyldyqtarda álem elderinde eńbekke degen kózqaras birshama qubylyp keledi. Máselen, qazirgi tańda halqynyń basym kópshiligi eńbek etýden qalǵan memelketter bolsa, endi bir el jappaı eńbekqorlyǵynyń arqasynda álemde básekege barynsha qabiletti sanalyp otyr. Osyndaı jaǵdaıdy saralaǵan Elbasy Nursultan Nazarbaev el egemendiginiń tirnegi – eńbek ekenin udaıy aıtyp, ásirese keleshek jastardy tynymsyz eńbekke shaqyryp keledi.
Shyndyǵynda, munaı baılyǵyna shalqyǵan keıbir arab elderi sońǵy jyldary halqyna aqshany taratyp berýdi dástúrge aınaldyryp, nátıjesinde azamattaryn qarapaıym jumystan birazyraq ajyratyp alǵan-dy. Osynyń saldarynan qazir ondaı elde tipti taksı júrgizetin de óz eliniń adamy qalmaǵan, bárin shetelden kelgen mıgranttar atqarýǵa kóshken. Bul baılyqqa belsheden bata bastaǵan eldiń eńbek etýden qalyp bara jatqanyn kórsetse kerek. Al kerisinshe kúnine 10 saǵat jumys isteıtin kárister búginde dúnıe júziniń aldyńǵy qatarly eli bolsa, aptanyń ár kúnin demalysqa aınaldyrǵan grekter sońǵy ýaqytta «masyl halyq» dep atala bastaǵan edi.
Memleket basshysy jastarǵa arnaǵan sózinde osy mysaldardy da birshama alǵa tartty. «Barlyǵy eńbekpenen jasalady. Baqyt basyńa eńbekpenen keledi. Óz eńbegimen tapqan bir túıir nan tátti bolady. Beker kelgen baılyq beker ketedi. Onyń bárin kórip júrsizder. Meniń zamandastarym, bizdiń býyn osynyń bárin kórip ósti. Biz birinshi alǵan jalaqymyzǵa qýandyq. 30-35 kelgende, 20 sharshy metr úı berse, tóbemiz kókke jetkenshe qýandyq. Munyń barlyǵy aýyr eńbekpen keledi. Eńbek etińder! Sonda ǵana elimiz myqty bolady, ózderiń baqytty bolasyńdar!», - dep jastarǵa aqyl-keńesin berdi Elbasy «Nur Otan» partıasynyń XV sezinde.
Budan bólek, Nursultan Nazarbaev eńbek adamyna erekshe qurmet bolýy tıistigin de udaıy aıtyp keledi. Osyǵan oraı, buǵan deıin «Qazaqstannyń Eńbek Eri» ataǵy berilip kelse, bıyldan bastap alǵash ret «Eńbek ardageri» medali berile bastaıtyn bolady. Al byltyrǵy jyly qyrkúıekti tuńǵysh ret elimizde Eńbek kúni merekesi atalyp ótilgen bolatyn.
Osynaý erekshe kúnmen jurtshylyqty quttyqtaǵan Elbasy: «Elimiz «Qazaqstan 2050» strategıasynyń negizgi tuǵyry – Jalpyǵa ortaq Eńbek Qoǵamyn qalyptastyrý jolynda senimmen alǵa basyp keledi. Qazaqstan ekonomıkasynda zamanaýı zaýyttar men kásiporyndar, jańa kúre joldar salynyp, ondaǵan myń jańa jumys oryndary ashylýda. Kólik jáne áýe kemelerin jasaý, lokomotıvter men ǵaryshtyq apparattar shyǵarý jáne ózge de kóptegen joǵary tehnologıalyq salalar paıda bolýda. Biz aýylsharýashylyǵyn damytýdyń, shaǵyn jáne orta bıznesti qoldaýdyń aýqymdy baǵdarlamalaryn iske asyrýdamyz. Kásibı mamandar daıarlaý salasynda sapaly ózgerister júzege asyrylyp, dýaldy bilim júıesi engizilýde. Joǵary nátıjeli eńbek etýdi yntalandyrý úshin «Qazaqstannyń Eńbek Eri» ataǵy jáne «Eńbek ardageri» arnaıy medali beriledi. Bul marapattar jyl saıyn úzdik aýylsharýashylyǵy eńbekkerlerine, metalýrgterge, munaıshylarǵa, ustazdarǵa, dárigerlerge jáne ózge de kásip ókilderine tapsyrylady. Eńbekkerlerdi áleýmettik qorǵaýdyń deńgeıi kóterilip, eńbek qatynastary týraly ulttyq zańdarymyz jetildirilýde, kásipodaqtardyń orny nyǵaıa túsýde. Árbir qazaqstandyqtyń laıyqty, adal jáne kásibı eńbegi Qazaqstannyń uly maqsaty – álemdegi eń damyǵan 30 eldiń qataryna kirýiniń kepili bolmaq», - dep atap ótti.
Sosyn N. Nazarbaev adam óziniń eńbegi arqyly otbasyn ǵana emes, memleketti de nyǵaıtatynyn alǵa tartady. «Óıtkeni, zaýyttar men fabrıkalar eńbekpen salynady, ǵylym da eńbekke negizdeledi, kitaptan bastap bári de eńbekpen dúnıege enedi. Eńbek adamnyń armanyn oryndap, qoǵam damýyna oń yqpal etedi. Eńbek táýelsizdikti týdyrady. Eńbekpen tabylǵan aqsha adamǵa táýelsizdik beredi. Sondyqtan da men barsha jastarǵa eńbek etińder dep aıtýdan jalyqpaımyn. Óıtkeni, táýelsizdikti saqtap qalyp, damyǵan elder qatarynda bolý úshin, memlekettiń ekonomıkasy qýatty, qorǵanys qabileti myǵym, halqy saýatty jáne eńbekqor bolýy shart», - deıdi Nursultan Ábishuly.
Álbette, Eńbek kúnin merekeleý eńbek adamyna, kásipke degen qurmet qana emes, jalpy eńbek etetin jurtshylyqtyń áleýmettik kóńil-kúıine aıryqsha nazar aýdarý, básekege qabiletti jáne qýatty jalpyǵa ortaq eńbek qoǵamyn qurýdyń sheshýshi ulttyq faktory retinde eńbekti moıyndaý bolyp tabylady.
