"200 teńge Rozybakıev kóshesine deıin", -dep Atakentten taksıge otyrdym.
"Qyzym, 200 teńgege ne alýǵa bolady?", -dep júrgizýshi kúldi.
Bala kúnnen esimin estip ósken Ábdirahman Asylbek aǵamyzben osylaı tanystym. Ol kezde 7-arnada tilshimin.
Taksı júrgizýshiniń óte ataqty aqyn ekenin bilgende uıalyp kettim. Ol kisiniń qarapaıymdylyǵyna rıza boldym. Úıge jetkenshe áńgime aıtty.
Aqyn jataqhanada turamyn degende kózim sharadaı boldy. Qazaqtyń keń baıtaq dalasynda barlyq úılený toıda shyrqalatyn "Jar-jar" ániniń avtorynyń baspanasy joq, jolaýshy tasymaldap júrgenin estigende talantty jandardy nege qurmettemeımiz dep qynjyldym. Biraq ol kisiniń qarapaıymdylyǵy meni tań qaldyrǵan edi.
2016 jyly 31-arnada "Nege?" baǵdarlamasyna aqynnyń ""Jar-jar" týyndysy jaıynda sújet jasadyq. Óziniń dosynyń úılený toıyna arnap jazyp, "jar-jar" áni qazaq dalasyna jyldam taraıdy.
Biraq avtorǵa áni úshin eshkim bir tıyn tólemedi. Aqyn da aqy tóle dep eshkimnen suraǵan joq.
Eger tyńdaýshylar ánge tıyn-teben tólegende Ábdirahman Asylbek álemge áıgili mıllıonerdiń biri bolar edi. Biraq qazaq jeriniń qazba baılyǵyn satyp maldanǵan baılardaı emes, bul kisi ónerimen, eńbegimen mol baılyqqa keneler edi.
Búgin aqyn aǵa da ómirden ótti.
Jazıra Begaly
