Memleket basshysy búginde álem tabysty dıalog pen ózara túsinistikke qol jetkize almaı jatqanyn atap ótti dep jazady Qamshy.kz aqparat agenttigi Aqordanyń deregin negizge alyp. 

Memleket basshysy samıttiń plenarlyq otyrysynda sóılegen sózinde qaqtyǵystardyń kóbeıýi, sanksıa jáne saýda soǵystarynyń órshýi jaǵdaıynda halyqaralyq saıasat shıelenistiń shegine jetip otyrǵanyn aıtty. 

"Biz búgingi "Azıa-Eýropa" forýmynyń samıtin osy problemalardy sheshý úshin paıdalanýymyz qajet. Ókinishke qaraı, qazirgi kezde álem tabysty dıalog pen ózara túsinistikke qol jetkize almaı keledi. Bárimiz ótken ǵasyrdyń 60-jyldaryndaǵy Karıb daǵdarysyn eske salatyn búgingi ekonomıkalyq jáne saıası teketiresterge kýá bolyp otyrmyz", – dedi Qazaqstan prezıdenti.

Nursultan Nazarbaev bul samıt AQSH, Reseı, Qytaı sıaqty álemniń iri elderin, Eýropa Odaǵyn halyqaralyq shıelenisterdi sheshýdiń jolyn izdeýge shaqyrýy qajet ekenin aıtty. Bul másele BUU Bas Assambleıasynyń arnaıy sesıasynda da qarastyrylýy múmkin.

"Eger Sırıadaǵy, Ýkraınadaǵy jáne ózge de elderdegi problemalardy rettemesek, ahýal odan da kúrdelene túsedi. Balıstıkalyq raketalardyń taralý qaýpi seıilmeıinshe, halyqaralyq terorızm basty másele bolyp qala bermek", – dedi memleket basshysy.

Qazaqstan prezıdenti álemdik ekonomıkadaǵy jaǵdaıdyń kúrdelene túsýine baılanysty keıbir kedeı memleketterdiń ahýaly odan ári qıyndaıtynyn aıtyp, adamzat úshin onyń eleýli qaýip-qater sanalatynyn atap ótti.

"Ekinshi Dúnıejúzilik soǵys pen basqa da qaqtyǵystardan keıin memleketter kóshbasshylary tyǵyz yntymaqtasyp, terorızmmen kúres júrgizý isinde ortaq sheshimder taba bildi. Sondyqtan, men barlyq elderdi dıalogqa shaqyryp, kelissózder júrgizý úshin Astana alańyn paıdalanýdy usynamyn", – dedi Nursultan Nazarbaev.

Sońynda memleket basshysy Qazaqstannyń Azıa men Eýropadaǵy jahandyq syn-tegeýrinderge qarsy turýǵa baǵyttalǵan seriktestikke belsendi atsalysýǵa daıyn ekenin taǵy da atap ótti.