Qurdymǵa ketken komýnızmniń bel balasy komsomoldyń 100 jyldyǵy táýelsizdigin alǵan Qazaqstanda atalyp ótti. Almatynyń Abaı atyndaǵy opera jáne balet teatrynda bir jyldary komsomolda qyzmet istegen, atalǵan uıymdy basqarǵan, komsomoldyń oblystyq, aýdandyq uıymdaryna jetekshilik etken ókilder kelip qatysty. Olardyń ishinde elge belgili tulǵalar, tipti qazirgi Májilis pen Senatta  depýtat bolyp otyrǵan «NurOtan» partıasynyń músheleri men tanymal qoǵam qaıratkerleri bar.

Kezinde komsomolǵa eńbek sińirgenderdiń  barlyǵy da aıtýly merekede «VLKSM-niń 100 jyldyǵy» medalimen marapattaldy. Keshe komsomolǵa múshe bolǵan bul azamattardyń  keıingi urpaqqa túk keregi joq uıymnyń 100 jyldyǵyn dúrkiretip ótkizýi túsiniksiz. Bul ótkendi saǵyný ma? Keshe Qazaqstandy komsomoldyń elesi kezdi. «Qazaqqa qan qustyrǵan júıeniń 100 jyldyǵyn toılaǵany nesi?» Jýrnalıs Dına Elgezek óziniń Feısbýktegi áleýmettik paraqshasynda osylaı dep jazdy. Munyń qanshalyqty qajeti bar edi?

Alash ordanyń 100 jyldyǵyn atap ótpegen úkimettiń belsendileri  komýnıserdiń quıyrshyǵy bolǵan jandaıshap komsomoldardyń 100 jyldyq mereıtoıyn atap ótti. Anaý-mynaý emes, Almatynyń Abaı atyndaǵy opera jáne balet teatrynda! Oǵan elimizdegi jetekshi partıanyń Májilis pen Senattaǵy fraksıasynyń ókilderi, sonymen qatar esimi elge belgili qazaqtyń qaıratkerleri qatysty. Ókinishti, óte ókinishti. Ultqa upaı bermeıtin sharany sýretten, áleýmettik jeliden kórip, ánsheıinde ulttyń sózin sóıleıtin azamattardyń oǵan barǵanyna qapa boldyq. Olardy endi qaıratker deýge bola ma?! Múmkin myna túrlerimen aldaǵy ýaqytta qazaqty qan qaqsatqan Keńes Odaǵynyń da «pálenbaı jyldyǵyn» atap óter. Eriksiz barǵan shyǵar, biraq «el ne deıdi?» dep oılasa netti?!

♦Taǵy da komsomol, taǵy da Lenın!

100 jyldyq mereıtoıda Qazaqstan Komýnıstik halyqtyq  partıasy ortalyq komıtetiniń hatshysy Jambyl Ahmetbekev pen atalǵan partıanyń Almaty komıtetiniń birinshi hatshysy, Qoǵamdyq keńestik múshesi Álibek  Shapenov komsomoldyń burynǵy belsendilerine, qazirgi ardagerlerine medal tapsyrdy. Olardyń ishinde Májilis, Senat depýtattary da bar. Sonymen, olar kimder?

1. Baqytjan Jumaǵulov, Senat depýtaty;
2. Birǵanym Áıtimova, Senat depýtaty;
3. Álı Bektaev, Májilis depýtaty;
4. Qýanysh Sultanov, Májilis depýtaty, Qazaqstan komsomolynyń birinshi hatshysy (1978-81 jyldar).
5. Nurlan Omarov, Qazaqstan komsomolynyń birinshi hatshysy (1991 j), Qazaqstan Jastar Odaǵy rtalyq komıtetiniń birinshi hatshasy (1991-94 jyldar).
6. Sabılá Mustafına, Qazaqstan komsomolynyń hatshysy, Qazaqstan Jastar Odaǵynyń hatshysy (1991-1995 jyldar).
7. Rahman Alshanov, Turan ýnıversıtetiniń rektory, Qoǵamdyq keńestik múshesi.

...Komsomoldyń mereıtoıynda medal alǵan «qaıratkerler», marapattaryńyz qutty bolsyn!