Qazaq ınternetinde buǵan deıin balamasy bolmaǵan «Qazaqıa 2015» blog-sapar baıqaýyna qatysýshylar óz joryqtary Qaraǵandy aımaǵyndaǵy Temirtaý qalasynda támámdap, Jańaarqa mekenine kelip jetti.
Osyǵan deıin Almaty, Saryózek, Úshtóbe, Aıagóz, Rıdder, Semeı, Aqsý-2, Ekibastuz, Temirtaý eldi-mekenderin basyp ótken joba qatysýshylary qazirdiń ózinde potensıaldy 100 000 qoldanýshysy bar aýdıtorıany qamtı otyryp, áleýmettik jelini 180-ge tarta qyzyqty, tarıhı, tanymdyq kontentpen tolyqtyrdy. «Qazaqıa 2015» qatysýshylary ár óńirdik ózine tán erekshelikterin foto, beıne, aýdıomaterıaldan bastap, reportaj, ınfografıka, «bir sýretpen», «bir sóılemmen» formalarynda jarysa jazýda.
18 sáýirde Ekibastuz qalasyna at basyn burǵan blogerler bul qalanyń shama kelgenshe kómirmen baılanyssyz tustaryn ashýǵa tyrysty. Mysaly, Serikbol Hasan qazaqtyń qolónerinen sheber bolǵan Dmıtrıı Fılıppovty suhbatqa tartyp, óner mektebin aralady. Bıjan Sádibekov bolsa, Saryarqany sýmen qamtyp otyrǵan Ertis-Qaraǵandy kanalyn túsirip, qaladaǵy tanymal graffıtıshimen ýaqyt ótkizse, Amangúl Madethanqyzy jergilikti ýorkaýterlerdiń ónerin taspalap, osy óńirden alǵashqy kendi ashqan Qosym Pishenbaev týraly derekterge qanyq etti. Al Aqbota Musabekqyzy bolsa, qaladaǵy ıpodrom men Báıit aýylynyń turmys-tirshiligin shynaıy sýrettegen posttarymen bólisti. Amanbek Maǵzumhan «Sheberler shańyraǵy» degen postynda qazaq qolónerin saqtap qalǵan azdyń biri – Zylıha Tólegenova jaıly jazyp, qala turǵyndarynyń ákim týraly pikirin jınasa, Nurbek Bekbaý «Bizdiń mektepti bitirgen birde-bir qyz ajyrasqan emes» dep, Qazaqstan boıynsha tek qyzdar oqıtyn jalǵyz gımnazıa týraly tolyq reportaj daıyndap, qaladaǵy aeroklýbtyń jumysymen tanystyrdy. Meıirman Saýranbek bolsa, osy topyraqta týyp, Gınnestiń rekordtar kitabyna 7 ret engen jelaıaq Marat Jylanbaevty zerttep, qaladaǵy qonaqúıler servısin de baǵalaı ketse, Elvıra Erǵalına eń arzan toıdyń Ekibastuzda ekenin dáleldeýmen qatar, eki aıaǵynan júre almaıtyn Sákenniń mysalynda ómir súrýdiń qanshalyqty qundy ekenine shaqyrady.
Blogerler tobynyń 19 sáýirdegi Temirtaý qalasyndaǵy sapary qazaq ınternetin, onyń ishinde áleýmettik jelilerdi Meıirman Saýranbektiń ańshylyq pen balyq aýlaý, Bıjan Sádibekovtiń jastar baseıni, Elvıra Erǵalınanyń ettiń nanyn shyǵaratyn kásiporyn men tramvaı jumysy, Amangúl Madethanqyzynyń tý ilý, Aqbota Musabekqyzynyń qysqy baq, Samarqan sý qoımasy jáne Shámshiniń «Tamdy arýyndaǵy» keıipker týraly materıaldarymen tolyqtyrdy. Budan bólek Nurbek Bekbaý qala kolejderine qoıylǵan kondomattardyń paıda-zıanyn tekserse, Nurlyhan Qalqamanuly sý astyna ketken Chkalov aýylynyń búgingi halymen tanystyrdy.
Baıqaý aıasynda jazylǵan jazbalardy jobanyń áleýmettik jelidegi paraqshalary men #qazaqia2015 heshtegi arqyly, sondaı-aq, qazaqia2015.kz resmı saıtynda tanysýǵa bolady.
«Altel» kompanıasy qoldaý bildirgen jobanyń jeńimpazdary – 22 sáýir kúni Astanada belgili bolady.
