Týǵan uldan Toıotany artyq kórgender uzaq merzimge temir torǵa qamaldy. Búgin Astana soty erli-zaıyptylarǵa 7 jyl úkim kesti.

 Sebebi tasbaýyr kelinshek kúıeýimen sybaılasyp jańa týǵan shaqalaǵyn kólikke aıyrbastamaq bolǵan dep habarlaıdy KTK arnasy. Biraq qylmys ústinde qolǵa tústi. 3 aı tergelgen atyshýly is búgin nebary 3 saǵatqa sozyldy. Al úkimdi estigende, týǵan balasynan bezingen áıel jylap jiberdi. Jańa týǵan ulyn saýdaǵa salamyn dep jas jubaılardyń kúlli elge aty shyqty.  Qursaǵyn jaryp shyqqan sábıin satyp baıymaq bolǵan ana da ne istep qoıǵanyn endi túsingendeı. Biraq qańtar aıynda oıyna túk kirmegen edi. 3 aı buryn Lúbov Túkenova perzenthanadan shyqqan boıda, qundaqtaýly bóbeginen qutylýǵa asyqty. Alaıda “tiri taýardy” kúıeýimen birge Toıotoǵa aıyrbastap jatqanda qoldaryna kisen salynǵan bolatyn.

Jas otbasynyń ınternetke jarıalaǵan habarlandyrýyn polıseıler oqyp qoıypty. Sóıtip satyp alýshynyń keıpine tártip saqshylary engen.

Endi olar saıt moderatoryn jazalmaq oıda. İske aspaǵan saýdadan soń 4 keli bop týylǵan balpanaqtaı ul qazir Astanadaǵy balalar úıinde tárbıelenip jatyr. Týǵan bóbeginen bezingen erli-zaıyptylar jaıly turmys izdep Ózbekstannan kelgen eken. 25 jastaǵy bezbúırek ana Ózbekstan azamaty. Al 29 jastaǵy kúıeýi óz otandasymyz. Osylaısha, 3 mıllıon teńgeniń Toıotasyn minbek bolǵandar túrmeden bir shyqty. “Lúbov Túkenova, Amanbek Túkenov kináli dep tanylyp 7 jylǵa bas bostandyqtarynan aıyrylsyn. Dúnıe-múlki tárkilenip, jazasyn qatań rejımdegi túrmede ótesin”, – dedi sýdıa Ivan Kern.

Mundaı úkimdi kútpese kerek kelinshek jylap jibere jazdady. Tipti sýdıadan aıaqasty qalǵan balarynyń taǵdyryna alańdaıtynyn aıtty.

Aqshaǵa qunyqqan bul ekeýdiń balaǵa qysastyq jasaǵany tek bul emes. Úlken qyzdary 8 jyldan beri jetimder úıinde tárbıelenip jatyr eken. Al 4 jasar uly Ózbekstanda týystarynyń qolynda. Búgin uly men kelininen kóńili qalǵan sheshesi sottan olardy qarǵap shyqty. Al áke-sheshesi bezingen ulǵa 3 aı tolǵan. Balalar úıindegiler oǵan Arman degen esim beripti. Deni saý, jetilýinde kinárat joq bala endi basqa otbasynyń asyrýyna berilýi múmkin. Al erli-zaıypty Túkenovterdiń advokaty apelásıalyq shaǵymnan bas tartty. Sondyqtan tasbaýyr ata-ana birden abaqtyǵa jiberiletin bolady.