1940 jyly Gıtler álemdi qaltyratyp turǵanda, Ulybrıtanıanyń premer-mınıstri ári qorǵanys mınıstri bolyp 65 jastaǵy Ýınston Cherchıll saılanady. Onyń Parlamentte óz ultyna arnaǵan alǵashqy sózi bylaı bastalǵan: «Meniń senderge qan men terden, kóz jasy men aýyr eńbekten basqa usynarym joq». Onyń osy sóziniń nátıjesi búkil álemge belgili. Cherchıll 1951 jyly 77 jasynda ekinshi ret premer-mınıstr bolyp saılanyp, 1955 jylǵa deıin 81 jasyna deıin taqta otyrdy.

 Ekinshi dúnıejúzilik soǵystan soń FRG-niń tuńǵysh kansleri bolyp 73 jastaǵy Konrad Adenaýer taqqa otyrdy. Qazirgi Germanıanyń negizin salǵan  ol 14 jyl taqta otyryp, 1963 jyly 87 jasynda doǵarysqa ketken. Osy ýaqyt ishinde ol soǵystan qısapsyz qırap shyqqan  eline álemdik jetekshi derjava dárejesin  qaıtaryp berdi.

 1953 jyly AQSH-tyń 34-prezıdenti bolyp 63 jastaǵy Dýaıt Eızenhaýer taqqa otyrdy. 1956 jyly 66 jasynda ol ekinshi qaıtara prezıdent bolyp saılanady. Kári tarlannyń Koreıadaǵy soǵysty toqtatyp, komýnıstik senimdegi ǵalymdar men qaıratkerlerdi qýǵyndaýdy toqtatqanyn aıtsaq ta jetedi.

 General Sharl de Goll 68 jasynda Fransıanyń basshysy bolyp saılanǵan. NATO-men baılanysyn úzip, fransýzǵa baǵynyshty elderge táýelsizdik ápergen ol 1965 jyly 75 jasynda Fransıa prezıdenti bolyp ekinshi qaıtara saılanady.

 Qytaı reformasynyń atasy sanalatyn Den Sáopın 1976 jyly 72 jasynda komýnıstik Qytaıdy basqarǵan. Qytaı qazir álemdegi ekinshi derjava bolsa, ol – osy Den Sáopınniń eńbeginiń arqasy. 1989 jyly 85 jasynda bılik butaǵynan birjola ketse de ol  ultynyń rýhanı kósemi bolyp qaldy. Qytaı halqy úshin ol teńdessiz bedel ıesi.

          Ronald Reıgan 1980 jyly 69 jasynda AQSH prezıdenti bolyp saılandy. Ekinshi ret qaıta saılanyp, 1989 jyly 77 jasynda taqty bosatty. Onyń ornyna 65 jastaǵy  Djordj Býsh otyrdy. 2008 jyly 72 jastaǵy Djon Makkeınniń Barak Obamamen birge AQSH prezıdenttigine taqqa talasqanyn umytqan joqpyz. Fransıany Fransýa Mıtteran 78 jasyna deıin bıledi.

 Izraıldi prezıdent  Shımon Peres 91 jasyna deıin bılep, 93 jasynda qaıtys boldy. Jahandyq ókimettiń ushar basynda dál qazir 96 jastaǵy Genrı Kıssındjer men budan eki jyl buryn   102 jasynda qaıtys bolǵan Devıd Rokfellerdiń turǵanyn da umytpaıyq. 89 jasynda qaıtys bolǵan  Bjezınskııdi aıtpaǵanda, qazir 89 jastaǵy Sorostyń  álemdik aqsha saıasatynda qalaı atoı salyp júrgenin aıdaı álem biledi.  Mine, Amerıkanyń aqıqaty.

  Osy mysaldarǵa qarap-aq memlekettik qaıratkerlerdiń tabysty bolýynda jas mólsheri emes, jeke sapalyq qasıetteri basty ról atqaratynyna  kóz jetkizýge bolady. El basyna aýyr qıynshylyq týǵanda kóptegen memleketterdiń jasy shaý tartsa da asa tájirıbeli qaıratkerlerdi bılik basyna otyrǵyzǵandaryna kári tarıhta mysal kóp.