Almaty oblysynda tanymal mesenat monshada turyp jatqan kópbalaly otbasyǵa jańa salynǵan úı syılady, dep habarlaıdy Qamshy.kz aqparat agenttigi Tengrinews.kz saıtynyń deregin negizge alyp. Otbasymen birneshe saǵat buryn eski monshada turǵan Qýanysh óziniń tańyrqap qalǵanyn jasyrmady. 

Jas kópbalaly otbasy Qýanysh pen Maqpal Janbolatovtar Uıǵyr aýdanynyń týmasy, ekeýi bes bala tárbıelep otyr. Kenje uly Mıras úsh aılyq. Otaǵasy Qýanysh — balalar úıiniń tárbıelenýshisi, sondaı-aq jaraqat alǵan soń, onyń bir kózi kórmeı qalǵan. Biraq, qıyndyqtarǵa qaramastan, ol úıine jaqyn ornalasqan bazarda ár túrli jumys isteıdi.

Otbasy eski monshada turyp kelgen, ony turǵyn úı retinde jasaqtaǵan. Ylǵal saldarynan balalar jıi aýyryp, úı jylymaıtyn bolǵan. Osy baspana úshin olar aı saıyn 17 myń teńge tólep kelgen. Monshada turatyn otbasy jaıly Facebook jelisindegi Online Qazaqstan tobynda vıdeo jarıalandy.

«Otbasynyń qaıǵy-qasireti týraly áleýmettik jeli arqyly bildik», - deıdi Almaty oblysy ákiminiń baspasóz qyzmetiniń jetekshisi Ǵalymurat Júkel.

«Tańerteń oblys ákimi messendjer arqyly kelgen beınerolıkti kórgen. Alaıda vıdeo arqyly osy otbasynyń dál qaıda turatyny anyq emes edi. Nátıjesinde biz olardy Talǵar aýdanynyń Gúldala kentinen taptyq jáne saǵat 16:00-de olardyń úıiniń aýlasynda boldyq». Almaty oblysynyń ákimi osy otbasyǵa bardy. «Biz qonaqtardy kútpedik, bireý esikti qaqty. Men esikti ashqanymda onda Amandyq Batalov tur. Ol basqa adamdarmen birge úıge kirdi. Balalarymen amandasyp, úlken balalardy qolynan alyp, bizge ózimen birge júrýin surady», - deıdi Qýanysh Janbolatov.

Kólik Turar Rysqulov kentine otbasyn aparyp, olardy tanymal mesenat ári kásipker Asqar Súleımenov qarsy aldy.

«Men sizderdiń jaǵdaılaryńyzdy bilgende kásipkerlerdi kómek kórsetýge shaqyrdym. Asqar Fazyluly qol ushyn berdi, endi mine bul jańa úı sizderdiki. Baqytty bolyńyzdar», - dedi oblys ákimi.

Otbasymen birneshe saǵat buryn eski monshada turǵan Qýanysh óziniń tańyrqap qalǵanyn jasyrmady. Al balalar aldymen qonaqqa keldik dep oılaǵan. Biraq keıin ózara bólmelerdi bóle bastady.

«Biz búdjet qarajatynan bastap mesenattarǵa júgingenge deıin qoldaýdyń túrli nysandaryn paıdalana otyryp, osyndaı otbasylarǵa kómektesýge tyrysamyz. Mysaly, bul kúni Janbolatovtar otbasynan basqa, Qarasaı aýdanynda kóp balaly Qasymovtar otbasyna da qoldaý kórsetildi. Bul otbasy aqaýy bar peshpen lashyqta turdy. Qazir olar ýaqytsha turý úshin basqa úıge kóshirildi. Olarǵa úı salý úshin ýchaske bólindi. Sonymen qatar, otbasynyń eresek músheleri jumyssyzdyq boıynsha esepke alyndy. Áleýmettik tólemderdi alý úshin basqa da qujattar resimdeledi. Baqytty baspana ıegerlerine keler bolsaq, Qýanysh osy aýyldyq okrýgte jumys taýyp, oǵan múgedektikti rásimdeýge kómek kórsetiledi. Mesenat Asqar Súleımenov Qýanyshqa ózine saı keletin jumys taýyp berýge ýáde berdi», - dep qorytyndylady ákimniń baspasóz qyzmetiniń jetekshisi Ǵalymurat Júkel.

Usynǵan: Ásel Bolatqyzy