1484 jyly Eskı-Úrt qalasyna Temir Mańǵyttyń qyzy, Qazannyń jesir qalǵan hanshasy Nur-Sultan keldi. Ekinshi kúıeýi Ibragım kenet qaıtys bolǵan soń taqqa Nur-Sultannyń ógeı uly otyrdy. Ol hanshaǵa tynyshtyq bermeı, aqyr sońynda kishkentaı eki ulymen Qazan qalasynan qýyp tyndy. Qaladaǵy eń bedeldi áıel Gıraı eline attandy. Ol jaqta áıeldi tosyn syıǵa toly taǵdyr kútip turdy.

Nur-Sultan Qyrymǵa joly túsken soń bara salǵan joq. Elde onyń ákesi, baýyrlary turady. Árqaısysy Qyrym saraıynyń laýazymdy tulalary bolǵan. Birneshe márte turmys qursa da, er adamǵa kelgende joly bolmaǵan hansha jaqyn týystarynan pana izdep bardy. Jasy da 30-ǵa taıap qalǵan, ol zamanda 30 jas degen «kári» qyzdarǵa tán edi.

Ózi óte bilimdi boldy, birneshe aspapta oınaı alǵan, adamdardy emdeıtin qasıeti boldy, kallıgrafıa men gramatıkany jaqsy meńgerip, birneshe tilde sóıleı aldy, Quran oqyp, ony jurtqa túsindiretin.

Kóp uzamaı saraılyqtar Qazannan aqsúıek áıeldiń kelgenin estıdi. Ol jaıynda qaýeset te tez tarap úlgerdi. Halyq arasynda «Hansha máskeýlik knázdarmen tyǵyz-qarym-qatynasta, hat almasyp turady eken, qaıyrymdylyqpen de aınalysypty, ózi dana áıel» degen sóz júrdi. Rasynda Nur-Sultan hansha sondaı edi... Syrt kózge tym názik, úlbirep turǵan áıel bolyp kóringenimen, batyl ári táýelsiz boldy. Onyń sulýlyǵy sıpattaıtyn ańyzdar tarady. Qyrym hany Menglı Gıraı áıel jaıly estı sala tanysýǵa asyqqan, asa qyzyǵýshylyq tanytqan desedi.

Qazan handyǵy, Nur-Sultan hansha.Sýret avtory Shamsýtdınov R.G.

 Nur-Sultan da qarsy bolmady. Shyńǵys hannyń urpaǵy, onyń ústine bir eldi basqaryp otyrǵan hanmen nege tanyspasqa, aralaspasqa? Baqytty otbasyn qurýǵa taǵy bir múmkindik týyp turǵan sekildi. Hansha muny jibergisi kelmedi. Aqyry ekeýi kezdesip han Qazan hanshasynyń sulýlyǵy men danalyǵyna tánti boldy. Temir Mańǵyttyń úıine jıi kelip turatyndy shyǵardy. 1486 jyly Nur-Sultandy áıeldikke alyp, eldiń birinshi hanymy etti. Osylaısha noǵaılyq knáz qyzynyń úlde-búldege oralǵan jańa ómiri bastaldy. Han saraıynda...

Kúıeýine memlekettik isterde aqyl-keńesin aıtyp otyrdy. Han Nur-Sultanǵa tolyq sendi. Ony qoldady, osman sultany Baıazıd pen máskeýlik knáz Vasılıımen jazysqan hattaryn kótermeledi, maqtan tutty. Al 1492 jyly Nur-Sultan úlken qyzy Aıshany Osman hanzadasy Selımge turmysqa berdi. Kóp uzamaı Selım Osman ımperıasyn basqardy. 

Nur-Sultan hansha Kremlde. Shamsýtdınov R.G.

Keı kezderi kúıeýinen ruqsat alyp, qasıetti jerlerdi aralap turatyn. Tipti jarty jylǵa Máskeýge, Qazanǵa baryp turatyndaı dárejede edi.

Alaıda úshinshi kúıeýimen de baqyty uzaqqa sozylmady. 4 jyldan soń Menglı Gıraı o dúnıelik bolyp, bılik Gıraıdyń uly Muhammedtiń qolyna ótti. Taǵy birneshe jyl saraıdy basqarǵan Nur-Sultan oryn taǵyn Muhammed hannyń áıeli Nurymǵa bosatyp berdi. Alaıda saraıdaǵy bedeli túsken joq, qurmetti hanym boldy. Ataqty hansha úshinshi kúıeýiniń óliminen keıin 4 jyldan soń kóz jumdy. 

Gúlim Jaqan