Atyraý oblysynyń ákimi Nurlan Noǵaev quqyq qorǵaý organdaryn sıfrlandyrý máseleleri boıynsha vedomstvoaralyq komısıa otyrysyn ótkizdi.
Oblys prokýrorynyń orynbasary Baýyrjan Jumaqanovtyń aıtýynsha, sıfrlandyrý, qylmystyq isterdi elektrondy túrde tirkeý jumystary áli de jetildirýdi qajet etedi.
2017 jyly oblystyq búdjetten polısıa departamentin, bólimshelerdi qajet tehnıkamen jabdyqtaýǵa 406 mln teńge bólingen. 262 kompúter satyp alyndy.
- Tirkelgen isterdiń 27,3% ǵana elektrondy túrde júrgiziledi. Bul tómen kórsetkish, - dep atap ótti Baýyrjan Jumaqanov.
Elektrondy túrde tirkelip, keıin qaǵaz úlgige aýystyrylatyn derekter de bar. Bul kóbine ashylmaǵan qylmystarǵa qatysty.
Atyraý oblysynyń prokýrory Halıdolla Dáýeshovtiń aıtýynsha, elektrondy úlgige aýystyrylǵan qylmystyq isterdiń kórsetkishi tómen.
-Aqtóbe, Atyraý, Aqmola oblystarynda elektrondy júıedegi ister qatary az. Aqmola oblysynda tehnıkamen qamtylý
3%, Aqtóbede - 30% bolsa, bizde- 75%. Barlyq qajetti tehnıkamen qamtylǵansyzdar, bári jańa, biraq durys paıdalanylmaıdy. Sebebi nede? Búdjetten 406 mln teńge bólingen, birde bir oblysta mundaı qarajat qaralmaıdy, bul ákimdik tarapynan úlken qoldaý, alaıda, kórip otyrǵanymyzdaı polısıalar múmkindikti paıdalanbaıdy, - dedi oblys prokýrory.
- Bul polısıa departamentine ǵana aıtylǵan syn emes, atqarýshy organdarǵa da qatysty. Búgin prokýratýra polısıany synaıdy, mıllıondaǵan qarjyny alyp otyryp, múmkindikti paıdalanbady dep. Erteń esep komısıasy eger jumys júrmese, nege osynsha qarajat bóletinimizdi suraýy múmkin. Bul qarjyny nege mysaly basqa áleýmettik nysandarǵa bólmeımiz? Sonda ne dep jaýap beremiz? Bul suraq bárimizge qatysty,-dedi Nurlan Noǵaev.
Bul rette jaǵdaıdyń naqty sebebin anyqtaý mańyzdy. Pikirtalasta otyrysqa qatysýshylar polısıanyń osy baǵyttaǵy jumysynyń kóńilden shyqpaýyna kadr joqtyǵy basty sebep degen qortyndyǵa keldi.
Jıynda, sondaı-aq, jergilikti polısıa basshysy Álibek Qaıyrovtyń baıandamasy tyńdaldy. Qylmystyń kóbeıgeni týraly derekter bolǵanmen, jalpy jaǵdaı turaqty. Oblys ákimi atqarýshy bılik quqyq qorǵaý organdary durys jumys isteý úshin barlyq qajet jaǵdaıdy jasap otyrǵanyn atap ótti.
-Jergilikti turǵyndar problema bola qalsa, aldymen ýchaskelik polısıaǵa jáne ákimdik ókilderine habarlasady. Biz ýchaskelik polısıa qyzmetkerlerin turǵyn úımen qamtyp otyrmyz, ýchaskelik polısıa bólimsheleri salynýda. Bul óz kezeginde qylmys sanyn azaıtýǵa múmkindik beredi. Foto, beıne tirkeý jobasyn júzege asyrýdamyz. Jyl sońyna deıin beınebaqylaý kameralarynyń sanyn 1,5 myń birlikke jetkizemiz. Sizderdiń taraptaryńyzdan da jumys pen nátıje kerek,-dep atap ótti Nurlan Noǵaev.
Oblys ákimi otbasylardy talqandap, adamdardy bankrottyqqa deıin ákelip jatqan býkmekerlik keńselerdiń jumysyna polısıanyń nazaryn aýdardy.
-Býkmekerlik keńselerdiń jumysyna qatysty shaǵymdar kóp. Adamdar bir kúnde bar jıǵan-tergen aqshalaryn shashyp ketedi. Olar zańdy jumys isteıdi deıdi, biraq zańsyz kazınolar men osyndaı oryndardyń bary ras. Birikken reıd júrgizip, zańsyz áreketterdi anyqtaý qajet. Munyń bári túptep kelgende qoǵamdyq qaýipsizdikke áser etedi. Bul kásipkerlik qyzmet, jumystaryna aralasýǵa nıetti emespiz, biraq olar da quqyqtyq alań sheńberinde jumys isteýleri tıis, - dep atap ótti N. Noǵaev.