Qazaq tilindegi habar az bolǵany úshin telearnalarǵa ákimshilik jaza qoldaný usynyldy
Mádenıet jáne aqparat mınıstrligi qazaq tilinde jetkilikti kólemde habar taratpaǵan telearnalar men radıostansıalarǵa ákimshilik jaýapkershilik engizýdi kózdep otyr. Jańa normaǵa sáıkes, 2025 jyldyń 1 qańtarynan bastap aptalyq efır ýaqytynyń keminde 55%-y qazaq tilindegi kontentke arnalýy tıis.
Atalǵan talap buǵan deıin de zańda kórsetilgenimen, ony buzǵandarǵa eshqandaı jaza qoldanylmaǵan. Endi bul erejeni saqtamaǵan BAQ-tarǵa aıyppul salý usynylyp otyr.
Qazirgi ýaqytta ákimshilik quqyqbuzýshylyqtar kodeksine ózgerister engizý týraly zań jobasy qoǵam talqysynda. Azamattar óz pikirlerin 10 shildege deıin bildire alady.
Joba aıasynda tildik kvotadan bólek, jarnama ýaqytyna qatysty talaptardy buzǵan tele-radıo habar taratýshylarǵa da jaza qoldaný usynylǵan. Qoldanystaǵy zań boıynsha, jarnama efır ýaqytynyń táýligine 20%-ynan aspaýy kerek.
Sonymen qatar, mınıstrlik áleýmettik jeliler men vıdeoplatformalarda quqyqqa qaıshy kontent taratqandarǵa aıyppul salý júıesin engizýdi usynýda. Vedomstvonyń málimetinshe, 2024 jyly otandyq onlaın platformalarda 78,5 myńnan astam zańǵa qaıshy materıal anyqtalǵan, biraq onyń tek 24,3%-y ǵana joıylǵan.
Joba sheteldik tájirıbege de súıenedi. Eýropalyq odaq elderinde, Ulybrıtanıa men Ońtústik Koreıada tildik jáne jarnamalyq talaptardy buzǵan medıa uıymdarǵa mıllıondaǵan eýro kóleminde aıyppul salynyp, tipti platformalardy buǵattaý sharalary qoldanylady.
Qazaqstan bıligi mundaı qadam medıa mekemelerdiń jaýapkershiligin arttyryp, memlekettik tildi damytýǵa serpin beredi dep sanaıdy.
Eske sala keteıik, buǵan deıin bekitilgen 2030 jylǵa deıingi Til saıasatyn damytý tujyrymdamasyna sáıkes, 2029 jylǵa qaraı memlekettik telearnalardaǵy qazaqtildi baǵdarlamalardyń úlesin 85%-ǵa, al halyqtyń qazaq tilin meńgerý deńgeıin 84%-ǵa jetkizý josparlanǵan.
