Ortalyq komýnıkasıalar qyzmetinde ótken baspasóz konferensıasynda Qazaqstan Respýblıkasy Ulttyq ekonomıka mınıstrligi Statısıka komıtetiniń tóraǵasy Nurbolat Aıdapkelov 2020 jyly ótetin Ulttyq halyq sanaǵy týraly málimdedi.

Halyq sanaǵy shartty eki kezeńnen turady. Daıyndyq kezeńi. Maýsym aıynyń 1 men 30 aralyǵynda ıntervúerler turǵyn úıler men turǵyn emes úı-jaılardyń, qurylystardyń, sondaı-aq ondaǵy turatyn turǵyndardyń naqty sanyn anyqtaý maqsatynda árbir eldi mekendi aralap shyǵady. Bul kezeńde aýdandastyrýǵa daıyndyq júrgiziledi. Sanaqtyq aýdandastyrý – bul óńirdegi árbir eldi mekenniń aýmaǵyn sanaqty ótkizý úshin nusqaýshylyq jáne eseptik ýchaskelerge bólý.

Negizgi kezeń (qazan aıynyń 1 men 30 aralyǵy).

Qazan aıynyń 1 men 15 aralyǵynda, ıaǵnı tikeleı halyq sanaǵynyń alǵashqy 15 kúninde ınternet-saýalnama júrgiziledi. Internet-saýalnamada respondentter ózine jáne otbasy múshelerine Internet jelisi arqyly sanaq.gov.kz arnaıy saıtynda sanaq paraqtaryn óz betinshe toltyrady. Sonymen birge saıtta respondentterge arnalǵan túsindirmeler men arnaıy vırtýaldy kómekshi de bar.

Internet-saýalnamamen qatar 1-30 qazan aralyǵynda ıntervúerler jappaı saýalnama júrgizedi. Saýalnama jaýaptary planshetke engiziledi. Internet arqyly málimetter bergen respondentter ıntervúerler júrgizetin saýalnamaǵa qatyspaıdy. Halyqqa saýalnama júrgizý barysynda respondentti sáıkestendirý úshin suralatyn adamnyń JSN-i paıdalanylady. Saýalnama aıaqtalǵanda halyq sanaǵynan ótkeni týraly anyqtama beriledi. 2018 jyldan bastap 2022 jyl aralyǵynda Qazaqstan Respýblıkasynyń Ulttyq halyq sanaǵyna daıyndyq jáne ótkizý úshin Komıtetke 8 211 mln teńge somasynda qarjy qarastyrylǵan.

Tikeleı halyq sanaǵyn ótkizý kezeńinde 2020 jyly ýaqytsha sanaq personaly retinde (nusqaýshy-baqylaýshylar, ıntervúerler) 32,5 myń adamdy jumysqa tartý jáne ornalastyrý josparlanýda. Jaldanatyn azamattarǵa qoıylatyn talaptar: 18 jastan asqan Qazaqstan Respýblıkasynyń azamaty, bastamashyl, jaýapty, tez til tabysatyn bolýy qajet. Jumys ótili men kásibı bilimine talaptar qoıylmaıdy, planshetpen jumys isteı bilýi kerek.

Aqparat úshin Halyq sanaǵyn júrgizý kezinde ıntervúerde tómende kórsetilgender bolýy qajet:

• Aýmaqtyq statısıka organynyń qoly qoıylǵan jáne móri basylǵan, fotosýreti bar, aty-jóni jazylǵan, berilgen kúni men qoldanylý merzimi kórsetilgen ınterver KÝÁLİGİ.
• Halyq sanaǵynyń sımvolıkasy bar kók tústi SHARF.
• Halyq sanaǵynyń sımvolıkasy bar kók tústi PORTFEL. Turǵyn úılerge barǵan kezde ıntervúerlerde halyq sanaǵynyń logotıpi bar kýálik, sómke, sharftyń bolýy mindetti.
  Sanaq personalymen óteýli qyzmet kórsetý sharttary jasalady. Tolyq kólemde 30 kúnge qyzmet kórsetilgen kezde daıyndyq kezeńiniń ıntervúerine (tirkeýshige) kórsetilgen qyzmetteri úshin 75 743 teńge tóleý josparlanǵan. Tolyq kólemde 30 kúnge qyzmet kórsetilgen kezde negizgi kezeń ıntervúerine (sanaqtan ótkizýshige) kórsetilgen qyzmetteri úshin 94 678 teńge tóleý josparlanǵan.

Tolyq kólemde 45 kúnge qyzmet kórsetilgen kezde daıyndyq jáne negizgi kezeńderdiń nusqaýshy-baqylaýshysyna kórsetilgen qyzmetteri úshin 113 614 teńge tóleý josparlanǵan.