Taldyqorǵanda Sherzat Bolattyń qazasy boıynsha sot otyrysy jalǵasyp jatyr. 

Sot otyrysy oqıǵa bolǵan kúni jaraqat alǵan Nurqanat Ǵaıypbaevqa saraptama júrgizgen sot-medısınalyq sarapshy Ómirbek Jolymbetovtyń jaýap berýimen bastaldy.

Tekserý barysynda Ǵaıypbaevtyń sol kóziniń astynda qabaǵynda mólsheri 3,0 jáne 1,5 sm kógergen tústi qantalaý boldy. Oń jaq qulaq qalqanyndaǵy ósindisinde dál osyndaı sıpatta qantalaý bolǵan. Mólsheri – 2,0 jáne 1,0 sm. Shúıde bóliginde jumsaq tinderiniń isinip qabynýy tirkeldi. Bel tusynda syzyqty formaly terisi sydyrylǵan jara boldy. Onyń beti qyzyl tústi juqa qabyqpen qaptalǵan. Onyń mólsheri 15 jáne 4,0 sm. Oń jaq jambasy tusynda qıǵash tik jara bolǵan, onyń jıekteri tegis, ushtary doǵal kelgen, mólsheri – 1,2 jáne 0,1 sm, - dedi Ómirbek Jolymbetov.

Medısınalyq tekserýden keıin Ǵaıypbaevqa klınıkalyq dıagnoz qoıylǵan.

Bas-súıek mıynyń jabyq zaqymy, bas mıynyń shaıqalýy, basynyń mańdaı bóligi tusyndaǵy jumsaq tinderin soǵyp alýy jáne terisi sydyrylǵan jaralary, basynyń shúıde bóligindegi qantalaý, keýde qýysy músheleriniń jabyq zaqymy, oń jambasyndaǵy kóptegen shanshyla kesilgen jaralar, oń tizesi býyny tinderin soǵyp alýy, jambas bóligininiń oń jaǵynda shanshyla kesilgen jaralar, - dep sózin tolyqtyrdy ol.