Almatyda Halyqqa qyzmet kórsetý ortalyǵynyń burynǵy qyzmetkeri memleket menshigindegi jer telimderin alaıaqtyq jolmen ıemdengeni úshin sottaldy.

Atalǵan qylmystyq isti Qarjy monıtorıńi agenttigi Almaty qalasy boıynsha departamenti júrgizdi.

Almaty qalasy ákimdiginiń qaýlysymen ýaqytsha paıdalaný quqyǵy negizinde "Almaty" áleýmettik-kásipkerlik korporasıasyna Jýkov kóshesindegi 2,3 ga jáne Jamakaev kóshesindegi 6,3 ga jer telimderi 5 jyl merzimge berilgen.

“Buryn "Azamattarǵa arnalǵan úkimet" komersıalyq emes aksıonerlik qoǵamynyń qyzmetkeri bolyp jumys istegen Ábdijaparov jyljymaıtyn múlikti tirkeý júıesiniń qalaı jumys isteıtinin bile otyryp, ýákiletti organdarǵa jer telimderin ýaqytsha paıdalanýdan bas tartý týraly jalǵan kelisimder men jer telimderi jeke menshikke berildi degen jalǵan ákimdik qaýlylaryn tapsyrǵan. Alaıda is júzinde mundaı qaýlylar ákimdik tarapynan shyǵarylmaǵan”, – delingen habarlamada.

Osynyń nátıjesinde ol atalǵan jer telimderin zańsyz túrde óziniń "Aısha Grýpp" JSHS-niń atyna qaıta tirkegen. Keıin bul jer telimderin úshinshi tulǵalarǵa 1,3 mıllıard teńgege satyp jibergen.

Sottyń sanksıasymen naryqtyq quny13,6 mıllıard teńge jer telimderine tyıym salyndy.

Sot úkimimen Ábdijapparov Qylmystyq kodekstiń 190-baby 4-bóligi 2-tarmaǵy “İri mólsherdegi alaıaqtyq” boıynsha kináli dep tanylyp, 7 jyl bas bostandyǵynan aıyrý jazasyna kesildi.

Jer telimderi memleket menshigine qaıtaryldy, olardyń aýmaǵynda ınovasıalyq hab salý josparlanyp jatyr.